「唱作王子」馮允謙 (Jay) 周二（7 號）推出首張全英文歌專輯《ANOTHER SHADE OF BLUE》，同日在黃埔 TIDES 舉行 Music Live，與近千 fans 分享新碟所有作品，以及他私心英文歌單。Jay 以結他自彈自唱，慢歌時 emo 到不行，唱開心快歌時就勁風騷，又扮唱片封面側面問 fans：「靚唔靚仔？」突然落台握手派心派飛吻，互動一流。完場 fans 意猶未盡，大合唱〈How Many Times〉。Jay 感動並宣佈好消息：新碟出「彩膠」！

Source: 寰亞音樂

音樂會全企位，觀眾一邊聽歌一邊跟 Jay 音樂左右擺舞，非常 chill。而二樓 VIP 觀眾席星光熠熠，有來自法國的唱作女歌手 Joyce Jonathan、老友梁釗峰、師妹雲浩影 (Cloud)、盧慧敏 (Amy Lo)、師弟藍奕持 (Lester)，以及分別在〈See Through Ya〉和〈Break Me Down〉MV 擔任女主角的「Jay 女郎」坂部佩莎和王靖瑩 (Charlie) 等。

Jay 出場以結他自彈自唱〈Break Your Heart〉、〈Close to the Edge〉、〈She Don’t Love Me Anymore〉和〈See Through Ya〉等作品打頭陣，觀眾非常陶醉。之後他沾沾地說：「今次有啲威，呢張碟嘅曲和詞都係你哋最喜愛嘅我寫。」

他坦言在香港做英文歌並不容易，感恩公司和 fans 支持，夢想成真推出英文碟並舉行英文歌音樂會。他感謝 Band Leader 蘇道哲和一眾樂手，還有與他一同創作碟內部份歌曲的孖生細佬 Tim，但爆料笑指細佬掛住拍拖甩底。騷後 Jay 與部份買碟的 fans 逐一合照留念，其中不少 fans 兩個封面都買齊。

Show 後 Jay 接受訪問時，坦言今次比廣東歌音樂會更大壓力，說：「人生第一個英文歌音樂會，可能係英文，要求自己要唱得更好。雖然今日把聲有少少沙，但係喺個台上玩得好開心，希望所有觀眾都好 enjoy。」

除了新碟作品，Jay 特別挑選演唱對他別具意義的英文歌，其中包括電影《Closer》(誘心人) 主題曲〈Blower’s Daughter〉，他說：「呢首歌由我 high school 時候聽，係一部電影主題曲，特別有 feel，一直好想喺自己嘅 show 唱到。」

「喺香港做英文歌、出英文唱片好困難，通常會將資源做廣東歌，所以我能夠出英文碟，真係好幸運。而 fans 買我嘅碟，兩個封面都撐我，又大合唱我嘅歌，好感動。希望反應好，再出多啲碟。」Jay 透露推出「彩膠」，說：「我啱啱知道，好開心，我希望係淺藍色。」

封面 Version A

封面 Version B