曾比特 (Mike) 日前為《歌手 2026》聯名賽擔任助演嘉賓，拍住竇靖童 (童童) 合唱經典歌〈半點心〉，二人雖然從未合作，但一埋位就火花四濺！

Source: 英皇娛樂

這次的選曲原來是童童的主意，Mike 指童童一口氣掟出五、六首參考作品，他掌握方向之後再注入自己想法，整個編曲討論過程十分順暢。他大讚童童是一個勇於嘗試的音樂人：「我哋諗過不如一開始唔要鼓，營造靜啲嘅感覺，甚至舞台動作設計都一齊傾，成個過程好 easy going，係一個好 fun 嘅體驗。」

講到合作前的印象，Mike 自爆曾經於節目中翻唱過童童的〈Monday〉，一直很欣賞對方那種 chill 之餘又有 vibe 的風格。他坦言最初以為童童是文靜 I 人，擔心溝通會有阻礙，但一講到音樂，大家即刻變開籠雀：「佢 I 人嘅臉孔底下其實好熱愛音樂，仲要係一個好有趣嘅人！因為我好鍾意講爛 gag，每次我講爛 gag 嘅時候，佢都好捧場，好有反應俾我，俾到情緒價值我，好鍾意同佢做朋友。」

不過最搞笑的是 Mike 指二人合作過後，身邊同事竟然跟他說：「童童真係好可愛，好善良、好有趣。」Mike 無奈笑說：「我突然間 feel 到自己喺呢個同事心目中嘅地位不保呀，哈哈！」話雖如此，今次的聯乘，Mike 不但贏到舞台掌聲，更賺多一個知音老友。