Gordon Flanders 一連兩場《New Classics Live 2026》演唱會日前於麥花臣圓滿落幕。演唱會門票一開賣即被搶購一空，現場更吸引大批圈中好友到場力撐，包括 Dear Jane、洪嘉豪、moon tang、COSTANCE 康堤、Nancy Kwai、Kiri T、 康聰@Zpecial、煒賢@Zpecial、肥仔@Error 及 Dark 黃明德等，場面熱鬧。

Source: Warner Music HK

Gordon 以一身西裝配上超大紅色領呔登場，以翻唱方大同歌曲〈Rosy〉打頭陣令樂迷驚喜萬分，Gordon 更走到觀眾席與樂迷近距離以木結他自彈自唱為moon tang 作曲的〈夜闌人靜〉，而演唱其新歌〈可以不可以〉時 MC 張天賦更驚喜現身！

Gordon 亦有分享自己當初於尖沙咀 busking 時已認識 MC，其實比認識洪嘉豪更早，MC 亦於台上公開追歌債叫 Gordon 找數，怎料 Gordon 突然分享其實二人都「有條數未找」，原來二人曾經為〈花海〉而排過舞，可惜最後不了了之，MC 更說：「(找唔找數) 梗係唔係由你決定㗎嘛，梗係由你班 fans 決定啦！」立即引來全場尖叫。及後 Gordon 表示很感激 MC 當初選擇〈花海〉，MC 亦很感謝 Gordon 為他寫了這首歌，MC 更「打蛇隨棍上」說：「你寫多啲歌比我啦！」更叫現場樂迷比壓力 Gordon 找數！

Show 後 Gordon 直言有如釋重負的感覺：「因為未試過連開兩場，同埋對上一次開 show 都只不過係我嘅第一次，今次就係第二次，我覺得完全係一個新開始同埋新嘗試，亦都係新挑戰。今次演唱會Run Down 就用一個 pairing 嘅方式，一首係我自己新專輯入面嘅歌，之後再 pairing 十首我覺得經典、想去致敬嘅歌，或者影響我好深嘅歌，開場頭兩首歌我用咗方大同嘅〈Rosy〉，咁我覺得呢首歌嘅 vibe 同我嘅新碟入面第一首歌〈搖曳〉個 vibe 好似，咁所以我就將兩首擺埋一齊做 pairing。」

他亦有分享說，今次邀請 MC 任演唱會嘉賓是希望為觀眾帶來新鮮感，亦希望可以於演唱會上首唱他們的新歌〈可以不可以〉送給現場觀眾，對於這次演唱會對自己的評分及 show 後可有同公司請假休息？他說：「如果 100 分滿分，第一場我會畀 65 分啦，我覺得好嘅部分就係第一場我啲樂器玩得幾好，今日就 70 分啦！因為演唱會最重要都係「唱」吖嘛，哈哈！我覺得今日唱得好過噚日，我唔會對自己太 harsh，但係我覺得可以繼續努力！完 show 之後有個假期，但係好短，放 3、4 日就會返嚟香港，因為趕住有其他嘅演出，同埋我想快啲做新碟比大家聽，大家等我出新歌呀！」