關智斌 (Kenny) 全新廣東作品〈My Little Tinker Bell〉上架，這次新歌是送給一班對他不離不棄的 fans 及朋友，答謝他們一直以來的支持。不過提到拍 MV，Kenny 笑說是一個淚水與汗水交融的拍攝。

Source: 英皇娛樂

MV 找來 Kenny「老友狗狗」Max 及牠的一班兄弟姊妹一齊演出。一直有說小孩及動物是最難拍攝，Kenny 卻坦言十分順利：「完全冇大問題！我同 Max 合作開，之前有拍過好多廣告，好 friend 㗎！佢 train 得好好，好乖、又識做戲、又有表情。」看似順利，隨後 Kenny 又補飛：「除咗佢哋間唔時會喺地下度…… 或者拍拍吓走開咗屙尿，哈哈！」

其中有一幕是 Kenny 在做掌上壓，Max 就威風凜凜地站在他背上，Kenny 先讚 Max 乖，接着又爆出一個「重量級」笑料。原來拍主觀鏡頭 (即狗仔視角) 時，攝影師是站在 Kenny 身上拍攝，「大家睇落個畫面好似好溫馨，其實嗰陣我係幾辛苦，佢企咗喺我上面仲要連埋部攝影機，真係好重。我諗如果有個 side shot 嘅畫面都幾好笑。」

MV 最後講到狗仔離開，Kenny 亦有所感觸：「拍攝嘅時候都有諗返起自己之前養狗嘅經歷…… 都有啲心酸，亦都有啲觸動嘅位。」他希望將這首歌送給所有有養寵物、或已經失去寵物的朋友：「呢一種別離其實都係開心，因為佢喺你人生入面陪伴咗你一段時間，令到你成長，學咗人生寶貴嘅一課。」

新歌〈My Little Tinker Bell〉概念亦甚有意思，將一直支持 Kenny 的 fans 及朋友比喻做「小天使」，是他們的魔法才令 Kenny 這個「彼得潘」可以繼續在娛樂圈中飛來飛去，永遠長不大。

歌曲找來 Ariel Lai 及鄺梓喬編曲，陳考威監製，旋律輕快入腦。填詞人林若寧更加將 Kenny 的心底話寫入歌詞：「失戀一晚我抱緊你，得獎一晚我抱緊你，兩老死，連我做魔鬼都包庇」，令人十分動容。

關智斌 -〈My Little Tinker Bell〉(Official Music Video)：