華納唱片 2025 年度女新人 CONSTANCE 康堤 自六月份宣佈進軍樂壇後推出首支英文單曲 〈doll〉大獲好評，旋即連續兩星期登上「903 豁達推介」第一位，令不少樂迷期待她的首支廣東單曲。繼她的英文歌曲〈doll〉後，新歌〈一律建議分手〉作曲由她本人和 Eason YH Chan 及 Ernest Choi 一起創作，黃偉文作詞，編曲 Eason YH Chan / Ernest Choi，監製 Ernest Choi。

新歌延續擺脫「有毒關係」的主題，但將焦點從愛情中的糾纏轉向跨越界線的友誼。CONSTANC 康堤用歌曲表達自己堅定的立場，拒絕被捲入那些與自己無關且不必要的鬧劇或情感負擔。新歌靈感更源於一次 CONSTANCE 的親身感受。

Source: Warner Music HK

創作靈感自親身經歷

CONSTANCE 康堤說：「我呢首新歌其實係有一排，好多朋友嗰段時間真係唔知點解佢地個個都有啲感情上嘅問題，嗰一排個個都好似就嚟分手，然後我 (當時) 又有好多事要處理，覺得好煩，所以就有啲憤怒，跟住就寫咗呢個 melody。我其實一入 studio 就同 Eason (Eason YH Chan) 諗住呢個感受去寫，其實當初個 demo 係因為我啲中文唔係咁好，所以我嘅 demo 就係用中文數字去寫，都幾得意嘅。之後就搵咗 YY 黃偉文去填詞，我就大概講咗我首歌有呢個 vision 係想咁樣寫，YY 就寫咗一份好好嘅詞，好適合我當初寫呢隻歌所諗嘅感受。」

她續說：「我哋寫呢隻歌嘅時候其實都幾好玩嘅，個 bridge 係英文字，嗰一段我哋係玩得好開心，我喺 studio 尖叫，好似發洩晒啲情緒咁去嗌。最好笑係後來我哋搵到一個 sample 係有個好似啲恐怖片嗰啲尖叫聲咁，最後就 sample 咗落去。我要澄清返其實嗰把聲唔係我，呢個都幾搞笑，所以我哋做呢隻歌嘅時候係玩得好開心！」

自言表情管理唔容易

而她亦分享關於拍攝 MV 的搞笑事，她說：「拍 MV 都有啲愕然，因為有一幕要抌紙，之前〈doll〉嘅 MV 要抌啲羽毛、將個枕頭抌嚟抌去，呢一個 MV 又係要抌紙，我唔知點解有少少尷尬，但又唔可以完全無晒表情管理，同時間要抌嘢、但又要好嬲咁嘅樣、但又要 cool cool 哋咁，再加上為咗出黎嗰個效果，同時間又有工作人員喺上空抌啲紙跌落嚟，我當時其實好驚啲紙會𠝹到我塊面，但而家諗返起就覺得呢一幕好搞笑。仲有另一幕要跑步，我當初知道個效果係需要有啲 slow motion，我就心諗『吓，我係咪要 slow motion 跑步？』但原來最尾知道係可以正常跑嘅，但我都諗緊我嘅表情係咪要好淡定咁？我覺得呢兩個 scenes 都幾搞笑、幾好玩。」

CONSTANCE 自認新歌未算最完美，需要下苦功練習廣東話！她說：「錄音嘅時候 Ernest 最苦惱，因為當時佢剪 take 嘅時候我係喺佢後面，咁因為可能我由細到大都唔係話特別聽好多廣東歌，嗰啲口音就出哂嚟，跟住錄音嘅時候 Ernest 就剪到好辛苦，我要加倍練習下啲廣東話，而家聽返我都覺得其實唔係最完美。」

而新歌推出後黃偉文亦分享了他與 CONSTANCE 的淵源，當年正正是 Wyman 為康堤取名，29 年後她的第一支廣東主打也剛好交到他手上，希望可作為「開學文具」送給她！

CONSTANCE 康堤 -〈一律建議分手〉(Official Music Video)：

CONSTANCE 康堤 -〈一律建議分手〉MV 幕後花絮：