上年洪嘉豪揚言 2025 年會有更多自己創作的作品，日前推出今年第二首包辦曲詞的新歌〈親愛的〉，歌曲有別以往較抒情、中慢板曲風，是一首 Pop rock 的抒情歌。

新歌〈親愛的〉找到曾任電視劇《二月廿九》及《940920》導演羅嘉駿擔任 MV 導演，MV 男女主角分別是曾參演電視劇《三命》的吳澤烽 (Tomi Ng) 及寶礦力水特廣告女主角之一顏俐 (Lily Ngan)，MV 講述飾演燈箱師傅的嘉豪在工作中，偶然遇上因感情事服藥而夢遊的女生，嘉豪決定默默地跟隨女主角於城市遊走，守護着她，陪伴着她迎來天亮破曉的一刻。

Source: Warner Music HK

嘉豪形容新歌〈親愛的〉的作曲部分一如既往，希望是一首帶點 Rock 味的抒情歌；至於歌詞部分，他幻想這個世界上有無數不開心的人、包括他自己，如何去渡過這個不開心的一晚，最後捱過等到天亮，這首歌的意境是敍述一個夜晚到朝早的過程，「所以我覺得呢首歌 (歌詞部分) 係應該要冇重複，越嚟越見到有曙光，所以 (歌曲) 一開頭會有啲 Minor chord，但係去到後段就會 bright 晒，其實都係一個幾大膽嘅嘗試，就係連個 Chorus 都係得一次，咁我諗廣東歌嚟講都非常少發生，再加上我好想用音樂去做一個即將天亮破曉嘅感覺，所以就有一個成分鐘嘅 Outro！哈哈！」

他續說：「至於歌詞其實都寫咗好幾個版本，好幾個版本都係寫到去 Chorus 就停咗手，就係因為 Chorus 嘅時候轉韻，所以歌詞上我都寫咗幾耐，呢首歌都寫得幾痛苦！(歌詞上) 呢首歌想講嘅內容都幾多，我個人成日都會有個問題問自己，到底係想要『及時行樂』定係要『未雨綢繆』？可能依家呢個時間，你會有好多嘢去為將來準備，籠統啲講可能係好努力搵錢、儲住啲錢、為將來打算。再加上我之前有一個重病，中咗甲流 (甲型流感)，因為嗰次實在太嚴重、太辛苦，我諗如果萬一 touch wood 今次我有咩事嘅話我會有咩遺憾呢？咁我發現原來我係冇真真正正享受過生活，跟住我係呢個前題下再諗，原來聽日如果你個人唔喺度嘅話，其實係冇呢個 (你所想嘅) 世界存在，大家成日都會話『世界好大，我哋好渺小』、『唔洗唔開心啦，你好渺小啫！都唔影響到啲咩』，但係我就係想講，我今日為明天準備咁多嘢、為明年準備咁多、為人生將來準備咁多嘅時候，如果你聽日已經唔喺度，其實 (你一直在努力的那個) 世界已經冇咗㗎喇！」

洪嘉豪 -〈親愛的〉(Official Music Video)：

問到他可有試過經歷人生低潮及如何渡過悲觀的日子？他說：「我相信每個人都會有 (悲觀的時候)，幾正面嘅人都會有！何況我都唔係一個好正面嘅人啦！至於點樣去渡過，其實都係『捱咗佢』又或者會逼自己『瞓咗佢』就算，我都經歷過好多大家都會經歷過嘅情緒，或者心理上嘅 panic，又或者好不安嘅東西等等⋯⋯ 呢首歌感覺好似係鼓勵，但其實我覺得係一個陪伴多啲，好想 (藉住呢首歌) 同大家講，其實我同你都係一樣，我都會經歷呢一晚！」

洪嘉豪 —〈親愛的〉MV 幕後花絮：