歌手黎展峯 (Andy) 今個月生日，踏入 27 歲的他日前獲一眾「黎膠」(Andy fans 名稱) 慶祝，晏晝生日 Cafe、夜晚生日 BBQ，實行馬拉松式慶生！

Source: 英皇娛樂

晏晝場的生日 cafe，fans 們一早到場佈置，場內貼滿 Andy 的相片及播放Andy 的歌曲，十分用心，fans 又於旺角買下 LED 電視廣告為 Andy 送上生日祝福，出錢又出力。而夜晚的生日 BBQ，為了回報 fans，Andy 為每位 fans 燒腸仔，又向他們送上泥膠，Andy 謂：「因為我啲 fans 叫『黎膠』，希望可以回返一份有心思同代表性嘅禮物。」既搞笑又溫馨。

BBQ 期間，更即興舉行了一場「廚神大賽」，fans 選取食物燒烤，然後由 Andy選出燒得最好的五位成為「廚神」，Andy 指雖然大部份 fans 看似不太會煮食，但看得出他們竭盡所能避免他肚痛，但仍有「地獄廚神」出現，他笑說：「有一份扇貝，令到我條脷鹹咗五分鐘，但冇人整唔熟食物，返到屋企都冇肚痾，哈哈！」

今年已經是 fans 第二年跟他慶祝生日，Andy 十分感恩：「由上年人數開到兩爐，到今年開到八個爐，對自己嚟講，亦都係一個好好機會去報答大家。因為啱啱呢半年，辛苦大家每一次落公司 Concept Store 聽我唱歌，由夏天聽到冬天，日曬雨淋，每次都全力支持我！希望大家今次 BBQ 玩得開心、食得開心，亦都希望之後每年都同大家慶祝。」

問到生日願望，Andy 直言希望去到啟德：「希望今年去到啟德…… 睇謝霆鋒師兄演唱會，哈哈！」接着說：「希望今年養成早睡早起、食多啲生果嘅習慣，等個人變靚啲，同埋希望今年嘅歌繼續俾到力量大家。」