李幸倪 (Gin Lee) 推出全新廣東大碟《Leap of Faith》，大碟收錄過去兩年所推出的九首作品，今年首支作品〈無愧於當初的我〉亦同日上架。

Source: 英皇娛樂

籌備兩年多，Gin 坦言想了很久怎樣才能總結這兩年她的心情，她謂這兩年作出很多新嘗試，同時踏出了自己的舒適圈：「好多時候會感覺到自己好似企咗喺懸崖邊，憑着信心去跳出一大步。所以最終揀咗呢個碟名《Leap of Faith》，直接翻譯就係『信心的跳躍』，作為呢兩年來嘅一個總結。」

〈無愧於當初的我〉屬 Gin 最愛新歌

大碟收錄 Gin 過去兩年推出的作品，問到最喜歡的一首，她指是跟大碟同日推出、今年首支派台作品〈無愧於當初的我〉，歌曲由馮穎琪作曲，周耀輝填詞，將得與失之間的比重重新審視：「首歌真係有好多我嘅心情寫照，亦都好似俾自己一個交代。呢兩年幾嘅大膽、鼓起勇氣，都做到有少少成績，到出呢隻碟，似係為呢一個階段嘅我、亦都係為呢一隻碟，畫上一個好靚好圓滿嘅句號。」

Gin Lee 李幸倪 -〈無愧於當初的我〉(Official Music Video)：

愛貓「杏仁糊」友情客串

今次大碟拍攝，亦請來一位「重量級」嘉賓合作，就是 Gin 飼養多年的愛貓「杏仁糊」，Gin 解釋，由於新碟的創作包含兩大方向：一個是大家平日見到工作 mode 的她、另一個是平日宅在家中的她，而對於後者來說，「杏仁糊」就是精髓，因為牠佔了 Gin 日常生活中一個很重要的角色，而私下的「Gin Lee」也蘊藏著平日大家無法看見的喜怒哀樂。

雖然如此，但身為貓奴的 Gin 亦先要請示主子「杏仁糊」的意願：「膽粗粗邀請佢影相，話俾佢知呢隻碟對我嚟講係好緊要，我係好有誠意同佢講，好希望佢可以參與今次嘅拍攝，我哋一齊留下一個美好嘅回憶。我仲話『你生得咁靚，梗係要俾世人睇到你嘅靚樣啦！』」誠意加上出力的讚美，最終成功。

向來跟動物拍攝都有難度，Gin 大讚杏仁糊拍攝當日相當專業及配合：「叫佢坐定定就坐定定、瞓喺度就瞓喺度。但係對於一個咁有性格嘅貓貓嚟講，佢都好捍衛自己嘅權益，影到咁上下，我哋都攞到我哋想要嘅嘢，想影多少少嘅時候，就 feel 到佢『夠鐘啦，我要收工喇。』咁我就會知道佢已經覺得有少少唔耐煩，即刻攞佢嘅袋出嚟『咁返屋企啦。』佢即刻自己行入去個袋度，急不及待想返屋企休息。」

Gin 坦言這次拍攝唱片封套是最開心、最輕鬆的一次：「一嚟有杏仁糊加持陪我，二嚟拍攝 setting 係一個屋企嘅環境，冇一種工作嘅感覺，我係好輕鬆咁去呈現一個好舒服、好自在嘅狀態，全部都記錄咗喺隻碟裏面。」