由上年唱到今年，場數一加再加，張敬軒於澳門倫敦人舉行、共三十三場的 《Dahlia Blossom HINs CHEUNG PRIME CLASSICS LIVE 2024 張敬軒澳門演唱會》 日前圓滿結束。這次演唱會，軒仔除了打破歌手於澳門倫敦人開 show 紀錄， 同時亦打破了澳門演唱會史上紀錄！

Source: 英皇娛樂

再次重臨澳門倫敦人場館，軒仔特別為演唱會加入新元素，除了揀選一些之前未有獻唱的歌曲，又特別為加場訂造三套全新歌衫，務求為樂迷送上驚喜。蔡卓妍 (阿 Sa)、02 年的親姊妹組合 2R 成員黃婉君 (Rosanne)、女團 VIVA 及海兒 (Hedy) 亦專程到澳門欣賞演出。

阿 Sa 專程到澳門支持軒仔開演唱會。

軒仔與師妹海兒合影。

甫開場，軒仔便笑問:「其實我想問吓係咪咁多場都係同一班人嚟㗎？」然後便說：「我要同呢個場嘅朋友 say 個 hi，thank you！亦都要多謝入過場、再一次入場嘅朋友嚟支持我。」

軒仔謂很開心完成上一輪的演唱會，加上主辦單位再次邀請加開四場，總共演出了三十三場演唱會，是他人生最長一次一個駐場演唱會。而世界各地歌迷亦專程飛到澳門睇 show，「今晚都見到好多 fans 喺唔同地方嚟，有香港、澳門、我老鄉廣州、北京、雲南、福建、重慶、台州、順德、深圳，咦！有觀塘嚟嘅朋友，哈哈！天津、悉尼、紐約，特登飛返嚟呀？咁咪好貴囉？我代表澳門政府多謝你，哈哈！刺激澳門消費，仲有荷蘭。」

新周邊「Dahlia 大麗花 (膠花)」惹社交媒體瘋狂討論

一如以往，演唱會場外，都有售賣軒仔的周邊，以往有唱片、tee 等等，這次亦有全新單品上架 —「Dahlia 大麗花 (膠花)」。當歌迷收到風這次會有膠花出售時，便於社交媒體瘋狂討論，笑說要抽出建議入貨膠花的「幕後黑手」，而軒仔亦於社交媒體上表示並非自己的主意，十分搞笑。雖然如此，但膠花銷情仍十分理想！

自開賣以來每日都售罄，對於這個「奇怪」現象，令軒仔於開場跟大家打完招呼後忍不住問：「相信入場之前有好多朋友幫襯咗出面嘅 merchandise，原來真係會有人買支膠花㗎！我知係 $100 呀，但咁你都買嘅，有冇搞錯？因為呢兩日台面啲機關要試行，同埋我肥咗，啲歌衫要改，所以我未追究到係邊個諗呢支膠花出嚟！但買還買，千祈唔好將兩支花擺喺我隻黑膠碟兩邊，坐喺度嘅時候我有啲驚，或者隻黑膠碟唔好楝喺前面。其實要講番，主辦單位同我講唔係膠花，係絲花嚟嘅，但有區別咩其實？」引來全場大笑。

軒仔唱〈故園花茶〉憶童年往事哽咽

當唱到〈故園花茶〉時，亦勾起軒仔不少童年往事。他小時候很喜歡恐龍，小學時廣州天河體育館舉行了一個恐龍展，恐龍展開幕不久，他很多同班同學已經去過，更將要去過展覽才有的 postcard 帶回學校炫耀一番，軒仔當時羨慕不已。

一天，軒仔便跟爸爸說想看恐龍展，爸爸說好，然後問多少錢，軒仔說五十元一張門票，「五十蚊喺嗰陣時已經係我哋屋企一家三口差唔多三分一個月、甚至乎係半個月嘅口糧。爸爸冇出聲，然後話星期六同我去。」

星期六，軒仔跟爸爸到了體育館門口，望了門口一陣子，剛好有位在展覽工作的阿姨經過，張爸爸便問可否帶軒仔入展覽，「爸爸話『我哋屋企比較困難，但係我個仔又好想去，所以好希望你可以幫我呢個忙，你帶咗佢入去就得㗎啦， 你唔使理佢㗎。』個 Auntie 好好咁帶咗我入去，行咗幾步擰返轉頭見到我老竇，佢係一個殘疾人，鋪咗張報紙喺地下坐喺街邊、坐喺部單車隔離，等我睇完出嚟。我已經入咗閘㗎啦，我喺閘入面沖返出嚟話『爸爸我唔去喇！你唔同我去，我都唔去。』然後我老竇就有少少發憫憎話『我已經厚住面皮叫個阿姨接你入去，你都唔去！』」說到這裹，軒仔開始有點哽咽，然後續說：「我話唔好啦，我唔想抌低爸爸。所以琴晚綵排唱呢一首〈故園花茶〉嘅時候，尤其我爸爸媽媽最近重新搬返嚟香港，其實佢哋走咗唔係好多個月㗎咋，佢哋三個月前返咗去，跟住返番嚟，我見到我老竇又老咗一圈⋯⋯ 所以我想藉住呢首〈故園花茶〉、藉着內心呢份情感，喺度同各位真心講一句，當大家有時間多啲返去陪吓爸爸媽媽，因為佢哋唔係事必喺我哋身邊。」

不過，原來恐龍的故事還有後續，軒仔隨後補充：「其實之後我同爸爸離開體育館準備返屋企嘅途中，見到體育館外圍嘅鐵絲網穿咗個㝫喎，最後我同爸爸就喺呢個窿入咗去睇恐龍展。」全場頓時爆笑，他又笑說：「我諗現場應該唔會有人睇霸王飛啩，嗱！我唔係鼓勵人睇霸王飛呀！」