為慶祝藍奕邦出道廿周年，他笑稱：「我覺得藍奕邦喺呢行生存到廿年都係奇蹟嚟，同埋大家呢廿年都辛苦啦，所以我哋嚟好好慶祝仲健在，哈！」他本人現隆重宣布，藍奕邦出道20周年企劃 — 明年 1 月將於西九文化區舉行一連三場「藍奕邦《要不要人見人愛》音樂會」；復刻 2004 年首張推出的個人專輯《不要人見人愛》製成黑膠碟，以答謝樂迷廿年來毫無餘地的支持。
率先預告將順序演繹入行首張專輯
明年 1 月舉行的廿周年個唱「藍奕邦《要不要人見人愛》音樂會」，率先預告於歌單上，他將會做香港歌手很少做的事：「我會喺其中一 part，將成隻《不要人見人愛》順序由頭到尾玩一次，我一直好想做呢件事，平時真係冇咁嘅時間，當然都會網羅返我咁多年大家都好鍾意嘅歌。」他期待從《不要人見人愛》開始串連起來，讓樂迷看到藍奕邦過往的二十年，以及他未來的音樂旅程。
一直以來，鋼琴陪伴著藍奕邦走過唱作之路，是次廿周年音樂會設計概念亦以一人一琴作主軸，當中更突顯藍奕邦反傳統的個性：「因為一般人影演唱會 key art 都會影到好華麗，反而我想就咁。」貫徹他廿年前創作的詞「只得一對手掌，一邊唱一邊彈，平凡變得漂亮」，呈現最乾脆俐落的藍奕邦。
回顧過去廿年，藍奕邦覺得自己沒甚麼大分別：「好慶幸，喺大家眼中嘅大染缸做嘢，我嘅價值觀、咩係啱咩係錯、我嘅品味，都幾堅持得到，呢個我係幾自豪嘅。」唯一不同之處，是他待人接物的態度：「我永遠都覺得，要識得同人溝通、相處，但係有啲位自己都要去堅持。細個係唔識攞個好嘅平衡，而家會識得搵個平衡點，有自己嘅堅持，同時都可以令人舒服。」問他這刻的藍奕邦是否最自在？他坦言不知道，但認為自在的時間比不自在的多：「廿年前派第一首《熱帶魚》嗰陣，我有九成時間係唔自在，而家識得喺唔自在之中去適應，更加享受自在嘅時間。」藍奕邦直言未有感懷身世、曾經滄海，反而有種「仲有好多嘢未做」的感覺：「我都好開心㗎，我覺得仲有好多嘢未做、未試，希望嚟緊自己嘅健康、身體同精神所有嘢都繼續好，可以繼續做更多嘢畀大家。」
提到最想邀請來睇騷的人，藍奕邦想也不想答道：「就係〈三點冰室(七點交吉)〉 (復刻新歌) 其中一個填詞人 —— 梁栢堅先生。我知道要做返呢首歌嗰陣，就好想同個填詞好鬼馬嘅人一齊創作，所以就搵咗佢。有日，我喺WhatsApp問佢點解要叫〈三點冰室(七點交吉)〉，佢話而家啲鋪頭，3 點仲做緊生意，7 點就可能執咗，一街吉鋪。就係一街吉鋪呢 4 個字，啱啱好放到落首歌度，咁 (首歌) 就功德圓滿啦，所以我好希望栢堅會嚟睇吓呢首歌。」最後，藍奕邦亦邀請新舊樂迷明年入場睇騷：「我覺得藍奕邦喺呢行生存咗 20 年都係奇蹟嚟，同埋我覺得大家呢廿年都辛苦啦，所以希望大家一齊嚟慶祝，慶祝大家都仲健在。」音樂會當晚，要與歌迷毫無餘地飲住跳、哭住笑。
藍奕邦 Pong Nan 〈三點冰室（七點交吉）〉 (Official Music Video)：
一連三場「藍奕邦《要不要人見人愛》音樂會」將於明年 1 月假西九文化區隆重舉行，門票現已公開發售！HK$980 門票限定加購升級組合，當中包括全球限量《男孩子！》EP single 紫綠迷彩膠、騷後見面會、限定海報，而音樂會門票於今天正式公開發售。
推出復刻 2004 年首張專輯《不要人見人愛》黑膠碟，別具珍藏價值
除了籌備音樂會，要數最快可以為樂迷做的就是推出復刻黑膠碟 —— 復刻整張 2004 年出道首張個人專輯《不要人見人愛》，藍奕邦更與出道時首間加盟的唱片公司 Sony Music 聯手製作，別具珍藏價值。當中邀得鬼才填詞人梁栢堅合作，以舊曲新詞的方式重製廿年前的作品〈三點冰室〉，改編成具時代感兼玩味十足的復刻新作〈三點冰室(七點交吉)〉。為何會選擇重製這首歌？藍奕邦說：「我反覆聽返《不要人見人愛》呢隻碟，好多歌同而家呢個社會都仲好連繫到，唯獨〈三點冰室〉需要一啲時代性嘅更新。冰室喺香港文化嘅代表性都好重要，呢廿年又有好多變遷，好多歷史悠久嘅冰室都開始執笠、冇乜人去。希望今次揀呢首歌，可以繼續傳承到香港冰室嘅文化。」
他指二十年前當唱作歌手，曲風較為局限，同期歌手如 at17、林一峰、周國賢及王菀之都偏重樂器彈奏及自然的唱腔：「廿年後，大家對唱作歌手嘅曲風容納度大咗，我想將呢廿年唔同嘅元素融為一體，希望〈三點冰室(七點交吉)〉有文藝氣息得嚟，又有啲我之前玩嘅電子元素，出嚟個效果同原裝好唔一樣。」
至於，這次為〈三點冰室(七點交吉)〉再拍MV，藍奕邦笑指是償還自己二十年前的心願。由於當時預算有限，MV 亦只是唱片公司宣傳人員手持攝錄機拍攝，他笑謂：「其實我覺得係唔好睇嘅。今次就可以拍返我 20 年前已經構思嘅嘢，一間好靚嘅冰室，有好多個我玩緊唔同樂器，好多謝兩個朋友阿權同何山，借咗好多樂器畀我，等我可以一人分飾好多角。」
藍奕邦《要不要人見人愛》音樂會
日期｜2025年1月3 – 5日（五 – 日）
時間｜8PM
地點｜西九文化區 自由空間 大盒
票價｜HK$980/ $780
HK$980 門票限定加購
升級組合｜HK$500
🌈 全球限量《男孩子！》EP single紫綠迷彩膠
🍄 騷後見面會
✨ 限定海報
門票公開發售｜11 月 15 日（五）
完整訪問影片：
發表迴響