李駿傑孖 Serrini 推出〈唯美本尊〉合唱版 — 擦出妖艷火花！

2024 年 4 月 16 日

上個月李駿傑 (Jeremy) 發佈的最新單曲〈唯美本尊〉極具 Rock 感，但今次 Jeremy 和 Serrini 攜手推出的合唱版本，放下了電吉他，轉以用木吉他作主樂器，再配合 Keyboard、木箱鼓和鼓；歌唱方面，再搭配 Serrini 的完美和音，呈現截然不同風格，卻同樣好聽！

Editor: Meiling Heung
Source: 大國文化

主動出擊邀請再度合作

最新單曲〈唯美本尊〉，找來 Serrini 填詞，早前拍攝 MV 時，對方更偷偷現身客串演出，令 Jeremy 驚喜萬分，亦因為這個緣故，Jeremy 想到要找 Serrini 一同推出合唱版，日前他們更為此拍攝了特別版 MV。

Serrini 在上次〈唯美本尊〉MV 中客串時，興之所致飾演住在 Jeremy 樓下的鄰居，其演出成為了 MV 的彩蛋。其實 Serrini 當日有向Jeremy教路如何演繹〈唯美本尊〉這首歌，Jeremy 道：「當日 Serrini 有教我點樣去唱呢份詞，同解釋點解咁寫，要擺咩語氣會好啲，我聽住佢唱，就覺得，啊！佢唱得好好聽啊！唔得，真係要同佢合作，所以拍完 MV 嗰晚就即刻 WhatsApp 花姐，問可唔可以合唱，然後再有同事幫忙，促成呢件事。」近期 Serrini 都旅居外地，鮮有在香港，但剛巧另有工作安排要回港一趟，造就 Serrini 特地抽空錄音兼拍 MV，〈唯美本尊〉合唱版也就此誕生。

合唱版的〈唯美本尊〉沒有特別轉 Key，但 Serrini 想加點新意，她說：「唔想就咁和音，好似冇乜意思，所以我加咗好多 Melody，同埋好似 Answer Back 嘅嘢，而家似新作品。」Jeremy 表示很喜歡這個版本，說：「當日錄音係我錄先，跟住 Serrini 錄，本來我錄完就可以走，但我唔肯走，要留喺度聽埋先。之前我聽到冇任何混音嘅版本都已經好好聽！到聽到完整版本，係非常鍾意。」

Serrini 大讚 Jeremy 表現專業

Serrini 在錄音室聽過 Jeremy 現場錄音的表現，也大讚他要妖要放鬆都可以按指導即時做到，十分專業，Serrini 更說：「我係幾 Surprise Jeremy 把聲幾入咪，同埋佢一嚟到就話食咗嘢 OK 可以即刻錄。監製驚佢嚟自男團，要跳舞，唱歌會唔會要多啲時間 Warm Up，又唔係，一入嚟就 Ready，歌詞又唔使睇！」Jeremy 聽到這裡即說：「自己歌嘛！如果唱唔到好大鑊，哈！」

〈唯美本尊〉表達忽視世界負能量

其實在製作〈唯美本尊〉之始，Jeremy 只是簡單地寫了短短的內容，他回憶內容道：「其實嗰陣我係想話，世界有好多負能量，有好多唔好嘅人與事喺我哋身邊發生，好多時候我哋冇辦法去改變佢，最多只能忽視佢，希望用呢首歌教大家點樣去忽視呢啲事情。我冇特登去諗擺啲乜嘢形象落去呢首歌裡面，但係 Serrini 就為我賦予咗本尊嘅形象。」

Serrini 亦解釋到她很想將 Jeremy 提到的負面情緒，變成了正能量，她道：「Jeremy 寫嘅幾句嘢太簡單，要深入啲，仲要將我自己成日幻想啲囝囝應該係咩樣，就安喺佢身上。因為我好鍾意〈半〉嘅 MV 造型，係諗住嗰個樣嚟寫，而歌名如果用『唯我獨尊』太過硬，然後就諗到〈唯美本尊〉，因為我哋成日覺得 Jeremy 好靚，但點樣再 Elegant 啲？而家佢染金毛就更加係『唯美本尊』嘅樣。」

延續〈唯美本尊〉MV 故事

而這個唯美形象的 Jeremy，除了在早前〈唯美本尊〉MV 出現外，今次在特別版 MV 中亦再度現身，因為這個特別版 MV，是上回的故事延續，Serrini 道：「上次客串我亂噏話自己係住樓下個女人，今次想故事延續，一個著綠色絲絨衫嘅女人返到屋企換衫，就換咗好 Casual T-Shirt 質地嘅裙，遇到 Jeremy 㩒門鐘到訪。」要知道 Serrini 向來都是鬼主意多多，性格隨和又不拘小節，在拍攝這個特別版 MV 時，便展現了她的獨有風格，但 Jeremy 卻表現緊張，Serrini 大爆：「頭先拍 MV 時，要 Jeremy 挨埋嚟，佢好似唔知點算好，勁緊張，好有趣！」Jeremy 難為情表示：「係呀，我驚妳介意呀！」Serrini 當然沒有介意啦！而 Jeremy 了解到 Serrini 的「底線」之後，也愈演愈放，本尊的氣𦦨也慢慢散發出來，與 Serrini 擦出前所未有的妖艷火花。

以下分別是〈唯美本尊〉獨唱版和合唱版，讀者不如聽聽自己喜歡呢一個版本呢？

Jeremy Lee 李駿傑《唯美本尊》 (Rise in Love) Official Music Video