詩式流行組合 per se 剛剛驚喜加盟香港 Sony Music 後，即推出新歌〈也許沒有未來神〉，歌曲由成員 Sandy 及 Stephen 共同作曲、編曲及監製，歌詞部份由 Sandy 操刀。歌曲靈感來自年青人遇上問題時有時會走進牛角尖，也許有人會認為「神」會給予指引，但所謂的「未來神」(喻意成年人)，可能只代表著周遭的聲音，試圖讓你認為遵從既有的標準一套便是最好的選擇，但每個人自身也有想法，找到自己獨特的角色，比起滿足別人的要求更為重要。

Editor: Meiling Heung
Source: Sony Music HK

尋找自我角色不求世界認同

Stephen 解釋新歌〈也許沒有未來神〉MV 描寫一個欠缺自信的學生尋找預言家角色「未來神」，未來神對學生提供 ABCD 套餐，只要跟從指引，日後便可以從事指定的職業，但這些「未來」從來就不是學生自己想要的，「未來神」所指的其實是親人或老師，總認為某些職業才能賺取金錢、成功、地位，但對學生而言，這些人並非神，沒有人能夠預計未來，反而自己去發掘自己所想，即使未必能達致世俗所認為的成功，但至少能找到自己的定位，亦算是成功的一種。

MV 主角小傑。

「未來神」 一角。

不想成為的大人。

再度與導演麥曦茵合作

per se 去年已有三首歌曲找來著名導演麥曦茵執導 MV，今次繼續合作，更有驚險事發生，Stephen 說：「今次〈也許沒有未來神〉同之前一樣，無論 MV 橋段或者故事發展，都係我哋一齊傾一齊度，今次亦係第一次有咁多夜晚嘅場景。其他演員晏晝已經開工，但我同 Sandy 夜晚 10 點開始拍到凌晨 4 點。拍攝地點喺山上面，大家都要開著自己手機燈好小心睇清楚條路驚仆親，都幾難忘。今次更加係我哋第一次玩火，當中 Sandy 要射出一支燃燒嘅箭，由於 Sandy 好驚火，我都好擔心佢，第一次因為射得唔好跌咗喺 Sandy 腳側邊嚇親大家，好驚燒著佢，好彩練多幾次之後 Sandy 愈來愈純熟，我哋講笑話下次奧運搵佢去揸火炬都唔驚啦！另外希望大家特別留意裡面飾演代表唔同職業角色身上嘅服裝，例如其中一隻雀仔角色嘅羽毛係用手套整出嚟，用咗唔同日常用品變成動物嘅身體部份，好特別。」

加入新公司，對於 per se 也是一個挑戰，Stephen 說：「今次係一個跳出咗舒適圈嘅決定，之前就算簽廠牌都係比較 indie 去做，好多策略性嘅嘢都係我同 Sandy 決定，出歌都當係試驗，亦唔需要同人交代太多；今次加入 Sony Music 個 team 大咗好多，好多嘢會跟 timeline 去做，唔會好似之前自己想幾時做先做，不過我哋都係趕急嘅人，所以問題唔大，最大唔同係 team 大咗多咗好多溝通。今次決定加入新公司係希望每首歌可以接觸同影響到嘅人會更多。」未來 per se 會計劃推出專輯和舉行音樂會，繼續推出英文和廣東歌，和不同國際單位合作，他們更希望跟管弦樂團合作，尋求更多外地音樂節演出機會，將 per se 的音樂帶給更多人。

「成功」應由自己定義

「成功」兩個字不用別人來定奪，未來由自己開創。對於仍然在掙扎的人，可以聽一下〈也許沒有未來神〉，Stephen 說：「歌曲的主角對未來仍有恐懼，其實可以慢落嚟，退一步，呢刻你認為最大件嘅事都唔需要急，盡量諗解決方法，唔好只係俾情緒帶動。我哋寫呢首曲希望作為年青人嘅一種陪伴，亦想佢哋知道未來仲未定，唔係喺讀書時期已經注定你一世係咪會成功。」也許沒有未來神，捉緊當下好好活出自己的人生。