林峯近日推出加盟華納後第四首全新廣東歌曲〈無傷大雅〉，之前因為疫情關係未能夠親身返港拍攝劇情 ＭＶ，所以這次 ＭＶ 特意找來一直與林峯在電影及劇集合作無間、默契十足的周秀娜做女主角，ＭＶ 二人飾演在一起很久的情侶，分手後林峯一直默默關心及照顧周秀娜，劇情非常催淚！新歌找來吳林峰作曲，林寶填詞，黃兆銘、徐浩編曲及徐浩監製。

Editor: Meiling Heung
Credit: Warner Music HK

「咁不如我哋真係試吓分開生活。」有幾多人對這句說話抱有共鳴？這正正是林峯新歌 ＭＶ 〈無傷大雅〉 中，女主角周秀娜所出演的第一句對白。劇情中林峯帶著悔疚、不知所措的眼神看著周秀娜，而周秀娜帶淚抱灰心的眼神回望，這一幕，應該戳中了不少對情侶的心坎。

雖然情歌經常被說「庸俗」，但同時非常「坦白」。情歌之所以能引起這麼多人的共鳴，是因為情歌那種撕心裂肺、呼天搶地的特質，正正能為失戀而無助的人提供最能宣洩情感的出口。〈無傷大雅〉所描寫的，是一對已分開的情侶，即使知道世界不再相信情歌、認為情歌已失去其價值，也希望透過這一首歌，最後一次用這種庸俗的方式去紀念他們的感情。

林峯說：「好有幸可以請到娜姐嚟做我嘅 ＭＶ 女主角，其實我哋之前有合作過電影、電視劇，但就係冇合作過 ＭＶ，因為佢都好少拍 ＭＶ 嘅，所以好有幸、好多謝佢今次嘅參與 ！」今次算是二人第四度合作，問到拍 MＶ 可有趣事？林峯笑言：「就係發現原來娜姐好輕，佢真係好鬼 Fit!」原來 MＶ 裹有公主抱娜姐的情節，林峯直言娜姐應該是他合作過的女演員裡最輕的一位。笑言：「真係㗎！原本我諗住要紮行馬咁，點知一抱嗰下，嘩！咁輕嘅⋯⋯哈哈！」娜姐亦笑言：「當佢抱起我嘅時候連我都覺得自己好輕，嘩，佢咁輕而易舉嘅哈哈！」原本娜姐很擔心，因為知道拍檔有腳傷在身，擔心自己的體重會令他傷上加傷。林峯回應道 :「呢排我腳傷冇操 ( 體能 ) 我都覺得妳輕，所以妳真係好輕！」

今次新歌林峯形容難度高，並認為這首歌是他當歌手以來，數一數二最難唱的，連監製徐浩都認同有難度。新歌由吳林峰寫給林峯，這個合作是怎樣開始的呢？林峯說道：「今次作曲人（ 吳林峰 ）係我第一次合作，好多謝佢寫咗呢隻歌俾我，係一首好好聽、好襟聽嘅歌。其實我同作曲人都有啲淵源，因為我叫林峯佢叫吳林峰⋯⋯」娜姐聽到這裏立即報以幾聲敷衍掌聲，林峯解說：「就係我第一次撞到佢嘅時候，佢話以前自己個名成日都會被人開玩笑，所以佢以前好憎我，我話其實我都明白嘅哈哈！我哋一路都好想認識對方，但一直都冇機會，今次機緣巧合之下終於可以合作！」

林峯在拍攝現場一直在練習唱歌詞，但 MＶ不是不收音的嗎？阿峯直言：「因為我係一個歌詞白痴，我自己啲歌唱十年都記唔到歌詞⋯⋯」娜姐聞言感到驚訝：「點會呀！ 你三頁對白可以即刻背到出嚟㗎喎！？」林峯立即解釋：「對白得！ 但歌詞真係唔得，記歌詞一直都係一件好難嘅事，因為歌詞係一粒字都唔可以錯，但劇本唔係。不過呢首歌反而我聽過兩次已經覺得歌詞好易入腦，旋律又好易上口，所以今次好多謝林寶寫咗咁好嘅詞比我，希望大家鍾意！」

問到兩位 2024 年的工作大計，會否分配多一點時間在港 ？二人說：「會呀，因為我地嚟緊電影方面都會有合作，應該好快又會再見，同埋電影裡面應該都會有好多對手戲！」

林峯〈無傷大雅〉訪問片段：

對於香港樂壇這幾年間急速改變及有許多的新名字冒起，有沒有一些名字希望來年可以合作？林峯亦有留意同公司 ( 華納 ) 的新音樂人，「其實無論做演員或者歌手，我哋都希望尋求新嘅突破同火花；無論係幕前定幕後，同唔同嘅人合作我覺得都係一個好好嘅嘗試同學習，但首先我係好想同我公司新嘅音樂人合作。」娜姐突然好奇問起林峯可有試過 Rap？阿峯說：「曾經在節目裡嘗試過，私下去唱歌有時都會挑戰試吓，自問唔識但都想嘗試，身邊都有 Rapper 朋友，我哋公司（ Rap 得嘅 ）都有 ＭＣ 同 Gareth.T ( 湯令山 )，其實仲有好多新人都好希望可以合作！」

問到林峯和古天樂二人一直於螢幕上合作多年，會否考慮合唱？娜姐聞言立即笑說 ：「我好想聽喎！ 哈哈！」阿峯笑說：「其實我問過㗎！哈哈！我提議話搵次不如我哋睇吓音樂上有啲咩撞到出嚟啊！因為其實古仔佢都唱得兩咀，佢都好鐘意唱 Ｋ 㗎！有時我哋自己公司搞慶功佢都會唱幾首歌，我都希望睇吓同古老闆喺音樂上可以有啲咩火花出到嚟！哈哈！」

林峯〈無傷大雅〉MV 幕後花絮：

最後，趕快觀看完整版〈無傷大雅〉MV 吧！