由邱彥筒 (Marf)、沈貞巧 (Gao)、許軼 (Day)、王家晴 (Candy)、陳泳伽 (Winka)、蘇雅琳 (Ivy) 及李芯駖 (Sumling) 組成的樂壇女子組合 COLLAR，繼 2024 年推出首張 EP《Unit 1201》後，相隔近兩年，將於下月 11 日再度推出專輯《PERSONA》；專輯將收錄 7 首全新歌曲：〈淚光〉、〈SKSKZAZA〉、〈刺客鬥死黨〉、〈初級成人禮〉、〈管理還管你〉、〈（almost) perfect girl〉、〈流浪足印〉，其中頭炮作品〈淚光〉率先下週一登場，為推出的 7 首新歌揭開序幕。

Source: MakerVille

Marf 期待樂迷反應

相隔近兩年再次出專輯，COLLAR 全員表示熱切期待，當中 Gao 表示：「兩年後再出碟，實在覺得非常感恩，知道出碟並非一件容易嘅事，團隊同我哋都非常投入，而且傾盡全力。我個人而言，呢次大碟嘅風格跟《Unit 1201》對比起來，有一種成熟嘅感覺，上次係勇敢闖公路，今次就好似路途上遇到嘅一啲事、成長中必經嘅人生車站，感覺有啲似續集。」

Marf 就透露，當知道拍板推出專輯後，她專登回看《Unit 1201》，她說：「唔知點解好想快點見到新專輯面世，然後將新舊專輯一次過睇；我覺得今次歌曲會比較適合大眾嘅類型，所以好期待新作品推出同觀眾嘅反應。」

猶記得《Unit 1201》擁有強勁的製作團隊，今次《PERSONA》亦不遑多讓，雲集多位重量級音樂監製：T-Ma、徐浩、蘇道哲、陳考威等，舞蹈方面除了有外國排舞蹈師編舞外，亦有香港新生代排舞導師加入，務求以嶄新舞姿上陣。

新曲風成熟感性

打頭陣的〈淚光〉將於下週一首播，歌曲旋律偏慢，有別於 COLLAR 節奏澎湃的風格，不過歌詞真摯，以記錄過去幾年 COLLAR 的經歷，Sumling 說：「過去幾年，我哋經歷好多，有開心、有辛苦、有喊過嘅時刻，而呢首歌就係想將嗰啲『喊過之後仲會發光』嘅瞬間記錄低。我哋 COLLAR 試過喺排練室、喺後台、甚至喺台上忍唔住喊，但每次喊完，我哋都會抹乾眼淚繼續行。呢首歌就係想講：眼淚本身都可以係一種光，佢唔代表你輸咗，而係代表你仲有感覺，仲會痛，仲會想好返。」Winka 指〈淚光〉的曲風是 COLLAR 初次嘗試，她認為：「COLLAR 就嚟五歲，呢首歌有一種感性得嚟又成熟嘅感覺，我覺得好啱時機成為頭炮作品。」

Candy 適合慵懶感

此外，7 首歌之中，Candy 表示最愛〈初級成人禮〉：「透過呢首歌，發現自己都幾適合嗰種慵懶感覺，因為呢首歌需要好放鬆、好慵懶感覺，所以錄音嘅時候好 chill，完全可以跟住自己嘅感覺去唱。」

至於 Day 最愛〈（almost) perfect girl〉與〈刺客鬥死黨〉，她笑說：「〈（almost) perfect girl〉歌詞好貼近我哋，好似寫我哋嘅故事，亦好似好多女仔嘅故事，覺得呢首歌會有好多共鳴；而鍾意〈刺客鬥死黨〉，因為係 COLLAR 初嘗試嘅曲風。」

Ivy 最愛〈流浪足印〉，Ivy 指：「因為呢首係我心中，覺得屬於 COLLAR 嘅歌！」