曾比特 (Mike) 全新廣東作品〈你所打的號碼暫時未能接通〉正式上架，今次 MV 找來同公司師妹黎紜蔚 (Vivian) 擔任女主角，二人於電梯中有場 sweet 對手戲，不過拍攝期間被途人亂入，甜蜜戲份頓變笑場。

Source: 英皇娛樂

Mike 大爆 MV 中最難忘的一幕係是在電梯內拍攝，劇情中，Vivian 要拉 Mike 到她面前，做出類似快將 kiss 的動作。怎料其中一 take，二人剛拉在一起時，𨋢門突然應聲打開，𨋢門外站着兩個途人，場面即時尷尬到爆。雖然兩位途人見到他們正在拍攝，但他們照樣行進𨋢中一齊搭𨋢下去，最搞笑是途人們全程冇停過口，其中一人望着 Mike 猛話：「嘩！你好靚仔喎。係咪日本人呀？呀！你邊樹人呀？你好靚仔喎！」最後發現原來二人搭錯𨋢，落到最底一層，臨走前還繼續追問：「我唔信，你應該唔係 local，你應該係其他國家嘅人，你好靚仔喎！」令到 Mike 哭笑不得。

而新歌出爐之後，Mike 在 IG 指自己「思考歌詞入面嘅爛 gag 能力退步咗」，問他現在思考到嗎？Mike 直認「未諗到呀！」不過同事及朋友都給了很多 idea，又笑說：「我發覺其實我真係唔係好適合行搞爛 gag 路線，所以而家決定俾自己行返型男路線、靚佬路線。」

新歌是 Mike 今年第 3 首的派台作品，除此之外，今年他又為曾傲棐 (Arvin) 的〈實物落差協會〉作曲，問到今次會否有自己的創作推出？Mike 說：「今年其實一直有 keep 住寫歌，keep 住 pitch 吓睇吓可唔可以有自己的作品。不過呢一、兩個月身體狀態未如理想，產量少咗，希望之後調理好啲，就可以追多啲自己寫嘅歌。今年其中有一首係 co-write 嘅填詞同作曲，已經準備好去錄，希望之後會有一個完全自己嘅作品出到嚟。」

曾比特 -〈你所打的號碼暫時未能接通〉(Official Music Video)：