Kiri T 推出新歌〈哈姆雷特下班了〉。新歌由她親自作曲，並聯同 Ian Ho 編曲及 Yoroko Chan 共同監製，黃偉文填詞。今次 Kiri 繼續誠實地面向內心，拆解大眾的「報復心理」，Kiri 認為緊抱恨意，其實是一種自虐。到頭來，這種執著反而無意間令自己淪為悲劇怪獸。果斷宣告「下班」無視仇恨，才是真正的高姿態，宣告與其在泥濘中糾纏，不如瀟灑「下班」！

Source: Warner Music HK

Kiri 分享這首歌的概念是源自 Wyman 的想法：「呢一隻歌就係講關於復仇，呢個 idea 係 Wyman 提出，我覺得幾得意，因為其實呢首歌嘅 melody 係好正面，我會形容為一啲好正面或者好童話嘅感覺，原來係可以有一個黑暗面嘅 twist，但係呢個 twist 去到最後都係正面嘅，因為呢首歌講緊唔好嘥自己嘅心力去復仇，無論你係幾憎一個人好，因為最尾輸咗都係你自己。」

問到 Kiri 自己是否一個會復仇的人，她笑說：「我唔容易寬恕人囉我只可以話，哈哈！但係我又未至於會復仇，我會好嬲囉！我係嗰啲會磨好刀鋒後 keep 住把刀，但係我又未至於會劈人，但我就會 keep 住嗰把刀囉！所以我覺得自己都未做到〈哈姆雷特下班了〉所講嘅『下班』。」

這支 MV 以 Visualizer 形式推出，Kiri 亦有分享本身她與團隊有為 MV 飛到台灣拍攝，選址是一間傳聞是猛鬼的荒廢酒店，想不到竟真的遇上怪事，最後整支 MV 失去了大部分片段，Kiri 說：「今次首 MV 遇到嘅阻滯直頭係無咗嘅！本身 MV 係想致敬《閃靈 (The Shining)》呢套電影，咁所以我哋就準備咗斧頭，MV 裡面我一直追殺一隻公仔，嗰隻公仔就係一直喺我 MV 都有出現嘅公仔叫做 TT。今次我哋做咗一個黑化版嘅 TT，拍咗好多 shot，有一個故事，但就喺我哋拍完之後，導演過片嘅時候發現張卡讀唔到，最後我哋救返好少嘅片段，咁所以就整咗個 Visualizer，我唔知呢個算唔算係一個靈異事件啦，但係我哋的確喺台灣一間出名猛鬼嘅荒廢酒店去拍，咁其實好多人都喺嗰度拍戲同埋拍 MV，所以我以為唔緊要啦，應該冇乜嘢嘅！」

原來發生的詭異事情還未完結，Kiri 續說：「同埋其中一個靈異事件係，雖然我哋無人真係見到有嘢嘅，但係的而且確係有件好 creepy 嘅事情發生，就係嗰個黑化 TT 公仔，唔知點解無人擺佢喺部𨋢度，但係部𨋢一開門佢就喺部𨋢入面！我問晒身邊嘅工作團隊，都無人擺嗰隻公仔喺部𨋢度，但係嗰個𨋢門一開，大家見到佢喺入面都有啲驚，見到隻公仔無啦啦自己搭𨋢落咗嚟！」

Kiri T -〈哈姆雷特下班了〉(Visualizer)：