《READY FOR GIN LEE 李幸倪 LIVE IN CONCERT HONG KONG 2026》演唱會昨晚 (8 日) 圓滿落幕。尾場氣氛超 high，李幸倪 (Gin Lee) 除了施展渾身解數大唱 hit 歌，又於台上真情大剖白，大談入行辛酸史及內心世界，大爆自己為了適應娛樂圈，曾特意買書學如何跟陌生人打開話題，認真又搞笑。

Source: 英皇娛樂

演唱會播出 Gin 內心世界訪問短片，她坦言最怕不被理解，慨嘆現在做歌手難，但女藝人更難，「女 artiste 通常都好瘦、underweight，我最瘦嘅時候瘦過而家差唔多 7 公斤，我坐唔到櫈，一坐 pat pat 就會痛，因為直接哽到 pat pat 嗰兩嚿骨。」

她強調不想這樣過，現在開心做回自己，很健康，還自嘲：「咁我而家又唔肥，係咪先？只不過比一個紙皮人肥咗啲啫！」對於網上留言叫她「瘦多十磅」，Gin 就瀟灑回應：「多謝，但係我好開心做自己！」引來全場掌聲。

演唱會上，Gin 跟歌迷有不少互動，有歌迷舉起自製大紙牌，寫着「對我講黐線」，Gin 睇到一頭霧水，「你寫咩啊？『對我講黐線？』黐線！哈哈，點解要講黐線啊？」笑翻全場；另一歌迷就舉牌要求「唔唱幸福門唔返屋企！」，Gin 即時 O 嘴：「咁大鑊？」

尾場嘉賓，Gin 請來她於《聲夢傳奇》的冠軍學員炎明熹 (Gigi)。這對「冠軍師徒」的對話充滿笑點。Gin 指自己跟 Gigi 十分相似，所以會彼此傾心事，又謂兩人都不喜歡比賽，Gigi 細細聲說：「係。」觀眾即時大笑，然後續說：「我係非常之唔鍾意比賽，大家知唔知點解？其實係因為我係一個好 hea 嘅人！」

全場又再次爆笑。Gin 聞言即笑問：「你係咪對自己有啲誤解？我一路都唔覺得你係好 hea 喎！」Gigi 則解釋：「因為比賽冇得 Hea，哈哈！所以就遇到妳囉！」Gin 笑言：「我鞭策你係咪？」隨後兩人合唱〈一加一〉，Gigi 再獨唱自己的新歌〈風旅〉。

演唱會尾聲，Gin 一口氣唱出歌迷瘋狂點唱的〈虛榮〉及〈幸福門〉，前奏一響起歌迷即瘋狂尖叫；〈企好〉則開啟全場大合唱模式，氣氛熾熱。第二次 Encore 唱完〈今天終於一人回家〉後，Gin 落台，但歌迷依然不肯離去，不斷嗌 Encore，最後 Gin 再度出場，應歌迷要求唱出〈雙雙〉，為演唱會畫上完美句號。

昨晚場面星光熠熠，來捧場的圈中好友包括霍汶希 (Mani)、關智斌 (Kenny)、泳兒 (Vincy)、周國賢 (Endy)、楊天宇 (Angus)、李靖筠 (Gladys)、MIRROR 成員 Anson Lo 及 Jeremy、ERROR 成員肥仔、COLLAR 成員Gao、Marf 及Winka、YT 周殷廷、JACE 陳凱詠、樂隊 Locksmiths 開鎖佬成員 Harry、大雄、Eric 和 Tom、馬浚偉及力臻等。

《READY FOR GIN LEE 李幸倪 LIVE IN CONCERT HONG KONG 2026》片段：