曾揚言希望 2025 年推出的所有單曲也出自個人創作的洪嘉豪，近日推出第三首包辦曲詞，並由 Larry Wong 編曲及監製的新歌〈下世愛你〉。歌曲以戰爭背景下的愛情為主題，從宏觀視角描繪愛情的深沉與堅韌。

Source: Warner Music HK

洪嘉豪 (Kaho) 分享說，「〈下世愛妳〉是今年第三首派台歌，雖然或許派台的時間有點遲，但始終他今年很想堅持製作一隻屬於自己創作的新碟，包括作曲、作詞，所以〈下世愛妳〉亦是他親自作曲和作詞的作品，回望繼 2020 年〈窮小子〉之後，就沒有再出過比較大路、獨唱 ballad 情歌，Kaho 說：「中間都會有其他歌可能〈活人標靶〉嗰啲，但係嗰啲就唔係太 (類似) 我以前〈窮小子〉嗰種『洪嘉豪 type』嘅情歌，即係會比較易認啲，所以都想趁呢個機會喺呢一隻碟裏面會有一隻自己嘅『K歌』。」

〈下世愛妳〉講述「今世」和「下世」，今世在一個戰地裏面，故事主角努力求生，但最後不幸地，對方無法倖存，但主角承諾對方，下輩子一定找到對方，亦會做今生為對方做過的事情。

問到 MV 最難忘的場景，Kaho 發揮一貫搞笑風格說：「MV 最難忘的場景其實真係嗰場喊戲，女主角同我都需要有一個力量去喊，而女主角今次我地搵咗一位演藝學院業畢業嘅演員，當然對佢嚟講，(喊戲嘅) 難度當然會冇我喊咁高啦，所以佢做先！哈哈！咁原來佢做都唔容易！大家最後都用咗好多時間，亦都試咗好多方法，導演同我同埋佢都互相溝通，盡量希望做到嗰個力量出嚟，最後我哋覺得都幾震撼㗎！喺現場睇住佢 (女主角) 嘅演繹！咁至於我呢？咁我就⋯⋯ 拍咗 1-2 個 take 嘗試 (喊戲) 之後，導演就話不如我哋用眼藥水，咁我係同意嘅！哈哈！但點知當個眼藥水一滴落我隻眼之後，我嘅情緒就嚟啦！導演即刻嗌 action，我就喊咗出嚟，不過好遺憾我嘅眼淚同埋眼藥水混為一體，可能觀眾只會睇到係眼藥水，但係其實裏面到底有冇眼淚呢？大家聽完我呢番說話應該都自有答案，唔該哂！哈哈！！」

2025 年年中嘉豪曾表示希望下年年頭能推出個人 EP，問到 EP 製作的進度，他亦透露進度良好，有機會可以提前推出！他說：「都可以透露少少嘅，咁就積極籌備緊，2025 年希望可以出到一隻 EP，我覺得呢一隻碟由今年〈閃光〉、〈親愛的〉跟住〈下世愛你〉，再加埋之後嘅作品，其實係講緊一啲我一直都擺喺心底裏好想講嘅題材，但係又唔想講出嚟，想用音樂表達，咁亦都因為做到呢一個 project 之後先真真正正去認清，其實『音樂』對洪嘉豪嚟講，就係一個將一啲唔想講嘅說話或者唔係咁容易打出嚟、講出嚟嘅東西寫落隻歌度去表達，你可以用暗語、暗示，或者用其他方法去講，我覺得係一個好有趣嘅地方，依家都仲做緊歌，趕緊尾，但係 so far 自己都好喜歡、好滿意，希望到時隻碟推出咗之後大家都會喜歡啦！」

洪嘉豪 -〈下世愛你〉(Official Music Video)：

〈下世愛你〉MV 幕後花絮：