泳兒 (Vincy) 今年第三首派台作品〈老殘遊戲〉正式上架，這次不再玩傷感情歌，而是同時間玩遊戲，探討人人都害怕，卻跑不掉的「衰老」課題。

歌曲風格大突破，加入電子節拍及歌劇式法文演唱，Vincy 更於酷熱天氣下穿着西裝褸喪跑，跑到頭暈兼手震，最後要狂喝寶礦力補充體力，在拍攝現場更要組團去廁所，指定要壯男護駕，看來 MV 有夠恐怖。

Source: 英皇娛樂

〈老殘遊戲〉歌名夠破格，原來是 Vincy 跟製作團隊對「衰老」的幽默自嘲。歌詞由黃偉文 (Wyman) 操刀，直白寫出「有個遊戲叫老得漂亮誰敢面對」，但並非叫人打 botox 或飲十全大補湯，反而強調「格調才可以防腐永存」，怎樣才算有格調？

Vincy 解說：「年紀大咗，經歷、智慧同修養先係最珍貴，呢啲嘢時間搶唔走。」這次音樂班底亦玩新意思，何鈞源作曲，蘇道哲及刁塑加入電子元素，令歌曲帶點輕快節奏感。

最驚喜是 Wyman 提議加插法文歌詞，監製阿道立即找來懂法文的朋友寫下 「Les rues pleines de grâce, Les raisins sont trop verts」，並且拜託朋友細心教 Vincy 法文讀音，Vincy 再用 opera 腔演繹，即時將「老殘」昇華到藝術層次。

講到拍 MV 趣事，Vincy 即「大吐苦水」：「今次拍喪屍片，要去停車場喪跑，同導演 Sheng 合作咗咁多次，之前上山下海都頂得順，唯獨今次跑幾次之後真係見頭暈同埋想嘔。」原來拍攝前 Vincy 沒有食晚飯，跑到血糖急跌，最後要急買寶礦力以及扒兩啖飯才能續命，她笑言：「今次仲要着住西裝褸喺酷熱天氣下跑，懷疑導演係特登要我還上兩個 MV 冇親身上陣條數﹐哈哈！」

最搞笑是 Vincy 被 MV 中的喪屍嚇到連去廁所都要「組團」：「真係好恐怖，所以要同事陪，仲指定要加個壯男，貪佢陽氣重嘛！」驚嚇位更是一浪接一浪，原來扮演喪屍的外藉演員 Carol 是廣東話高手！Vincy 發現後笑到肚痛：「我同佢講咗一輪英文，佢突然用流利廣東話答我，呢個最嚇親我！」

另一幕導演要求 Vincy 手持 cam 衝入店舖通知途人有喪屍，她一 take 過投入演出，扯盡喉嚨狂嗌「有喪屍！」全場立即死寂望着她，「導演話：『你咁大聲嗌，其實係吸引隻喪屍過嚟，你唔好咁大聲叫。閂咗道門，然後先至正常聲量通知佢哋。』我先至 load 到，係喎，我個邏輯完全錯咗，哈哈！」

雖然拍 MV 玩到又驚又攰，但 Vincy 表示十分值得：「首歌就係想講，無論幾驚衰老，保持自己風格同格調先最緊要。靚可以褪色，型格係唔會貶值。」

泳兒 -〈老殘遊戲〉(Official Music Video)：