日前黎展峯 (Andy) 跟黃明德 (Dark) 於銅鑼灣東角度 busking，引來不少途人及歌迷圍觀。兩人又分享不少演出趣事，Andy 自爆想跟 Dark 組限定組合，不過 Dark 就笑稱每次同台都係「被迫」！

Source: 英皇娛樂

Dark 表示已經四年未有街頭演出：「四年嘅時間都算耐，所以都係有啲唔慣。首先係太耐冇同觀眾咁近距離，另外就係天氣，而家夏天三十幾度，企喺戶外比較悶熱。」他又「埋怨」之前公司 Concept Store Busking 待遇太好，沒比較沒傷害：「有冷氣、ear mon，今次咁 raw 去 busking，聽返啲喇叭聲，少少唔慣啦，哈哈！」

Andy 則謂今次是人生第三次 busking：「雖然今次唔係相隔好耐，但都有種感動嘅感覺，因為第一次 busking 都係喺東角道呢度，當時係讀緊大學四年級。」他分享今次主要跟 fans 互動為主，「主要係唱 fans 點嘅歌，有 fans 俾咗兩首歌我揀，話會因應我嘅選擇而俾唔同嘅禮物我，最後我揀咗〈隱形遊樂場〉，然後佢就俾咗張佢自己畫嘅遊樂場入場券俾我，我覺得成件事好 sweet。」

提到二人最近經常合作拍片，會否考慮組期間限定組合或者合唱，Andy 興奮表示：「想組隊㗎，最想出跳唱歌，之後再力衝新人獎，哈哈！」不過 Dark 大盤冷水照頭淋：「其實同 Andy 所有嘅嘢我唔可以稱之為緣份，係少少被迫嘅，因為真係咁啱每次都被委派同一個工作。有冇諗過組隊呢？係冇嘅，亦都唔係咁想嘅，哈哈。但係冇計啦，佢好似好想同我做組合、好想同我合作，可能我會因為遷就佢而咁樣做嘅。」

演出期間，Andy 好友張馳豪 (Aska) 突然「野生捕獲」二人，繼而「亂入」跟 Andy 合唱〈會再見的〉及〈戀愛腦之死〉，Andy 又預告二人即將開 show：「〈會再見的〉係寓意我哋七月會再同大家見面。」

Dark 雖然冇份合唱，但都大讚：「我覺得 Aska 唱歌好犀利，甚至乎穩定過 Andy，叻過 Andy 啦，叻過晒我同 Andy，哈哈！」