張天賦 (MC) 今年 3 月 30 日便出道四週年，繼〈說謊者〉後，推出 2025 年的第二首主打歌〈懷疑人生〉，由 Wilson Chow 作曲、林若寧填詞、Nic Tsui 和 Larry Wong 編曲，以及 Wilson Chow 和 Larry Wong 監製。

新歌內容有別以前聽眾耳熟能詳的情歌，以「人生」作為主題，帶出許多人甚至是 MC 自己心中「懷疑人生」的想法與無力感。MC 曾分享他於出道前為生計而嘗試不同類型工作，如安裝冷氣、餐龐廚師、侍應及電話月費推銷員等等，恰巧非常貼切新歌主題，故決定 MV 故事參考他出道前的真實故事。

Source: Warner Music HK

MC 憶述昔日出道前曾經從事過的工作

MC 說 :「安裝冷氣係我返過嘅其中一份工啦，好記得當初比 MV 入面辛苦好多，而且多數做都係一啲唐樓或者 House (別墅)，上去三樓搬吓嘢，洗吓冷氣同換冷氣，搬搬抬抬之後就會發覺自己背脊多咗好多傷痕。」

他亦說：「其實除咗做過冷氣、餐廳，亦都做過介紹電話 plan 嘅，即係喺街邊拉易拉架然後等人過嚟查詢，我覺得呢個工作 (現實中) 比 MV 入面輕鬆嘅，因為一來其實如果搵街邊嘅人係可以攞到唔同嘅優惠，同埋佢哋之間亦有好多你唔知嘅程序上嘅玩法，所以基本上坐喺度都會有人埋嚟咨詢，就唔洗好似 MV入面咁 sell 客，除非你要追 quota，不過平時都要 (承受) 風吹雨打。」

而其實 MC 曾經亦在餐廳打過工：「餐廳就係因為當時喺一間餐廳唱歌，佢同我講唔夠人，你會唔會入嚟幫埋手呀？所以平時會幫手煮意粉、炸雞翼同炸薯條，夠鐘就出去唱歌，唱完歌就會返返入去幫手煮吓意粉。阿 Goo (Goo Chan) 亦都食過我煮嘅蟹肉忌廉意粉！可以 tag 吓佢，叫佢覆吓仲記唔記得咩味道！」

問到 MC 是否最拿手煮蟹肉忌廉意粉？MC 則回答其實餐牌上面的食物尚算容易製作，但若問到自己最喜歡的食物應該算是意粉。他續說：「如果純粹為興趣嘅話，我都想鑽研吓煮嘢食，甚至其實我都幾享受餐廳要煮嘢食，好多嘢要同時處理嘅嗰種繁忙。」

出道前曾經歷「懷疑人生」階段

〈懷疑人生〉講述我們在成長時遇到很多價值觀的衝擊，令我們會懷疑人生種種的事情，MC 亦分享他曾遇過這種情況及他的解決方法：「一定有遇過呢啲 (懷疑自己) 問題嘅，因為你必須要喺實際同夢想中揀一項去實現，好難兩全其美，所以我當時嘅決定，其實都唔係一個決定，我覺得同我性格有關，因為我係一個活在當下嘅人，我可以喺微細嘅地方搵到快樂，所以即使當時好辛苦，我都覺得開心又或者即使幾辛苦都好，busking 之後如果我可以買到我想要嘅咪或者喇叭，有人聽我唱歌就開心。」

他亦坦言成為歌手前的階段是他人生中「最差」的階段，因為曾經欠交租金及各樣繳款，需要同時做很多份兼職賺錢，真的很不容易：「辛苦嘅，係好辛苦嘅，而家回望返都真係 ⋯⋯ 唉⋯⋯ 盡在不言中，我都好少講唔到嘢。」

MC 推出新歌日子正值 DSE (中學文憑試) 開考，MC 也有分享自身經歷及鼓勵應屆考生：「可能我講嘅嘢未必啱哂，但喺我嘅角度，我認為DSE (中學文憑試) 其實只係一個階段，但並唔係會決定到人生之後嘅嘢，之後仲有好長嘅路、好多決定要做。所以唔需要擔心同灰心，只要你有盡過力，唔好俾自己後悔，即使今次失敗都好，呢個唔會係永遠嘅失敗，請你喺呢個失敗入面學習到錯嘅嘢，從而檢討更正！當然都希望每位 DSE 學生順順利利達到你自己想要嘅目標，攞到你想要嘅分數，入到你想入嘅學校，加油！！」

MC 張天賦 -〈懷疑人生〉(Official Music Video)：

張天賦〈懷疑人生〉MV 花絮影片：