女子組合 COLLAR 成員許軼 (Day)，日前推出首支個人單曲〈Wait A Second〉，首度「單飛」的 Day 為隆重其事，特意舉行「Wait A Second with Daypa」活動，邀請數十位粉絲一同 DIY 親手設計限量版 Daypa 公仔，首次與粉絲零距離接觸，Day 自言心情緊張又興奮，更表示下一首歌的 demo已出，呼籲粉絲們要密切期待！

趕上公仔潮

〈Wait A Second〉對 Day 來說意義重大，歌曲承載着她多個的「第一次」，舉行「Wait A Second with Daypa」活動，也是 Day 第一次與粉絲一起 DIY 設計 Daypa 公仔，她表示：「因為第一次出歌，加埋呢段時間有公仔潮，於是公司同事就諗可以舉辦一個活動，俾粉絲同我設計屬於自己嘅應援公仔，而呢個公仔就叫做 Daypa，雖然有好多 Fans Club 都有佢哋嘅應援公仔，但今次好特別，係配合埋首歌。」

自認選擇困難

提到首次與粉絲零距離接觸，Day 坦言心情有點緊張：「之前 COLLAR 有啲簽名會，都會同粉絲握手、簽名，但就未試過同 Fans 一齊參加 workshop，好似朋友咁一齊 DIY 公仔，感覺再 Close 啲，有緊張感覺。」

談到 DIY 公仔，Day 自言有選擇困難症，所以製作公仔上需時較長：「我喜歡 DIY 手作，但就唔擅長，加上我有選擇困難，整呢隻公仔，我都用咗兩三個鐘頭，我見 Fans 佢哋整得靚過我好多。」

準備推新歌

活動期間，發現原來 Day 的粉絲年齡層相當廣泛，當中更有「長者級」粉絲，對此 Day 大叫感動：「有一半以上粉絲都係因為睇《全民造星》而開始鍾意我哋，好感動佢哋一直支持，今次活動，有一種可以送番份禮物俾佢哋嘅感覺。」

提到〈Wait A Second〉MV 首播當日，COLLAR 一眾成員一同觀看，未知各成員對於其新歌 MV可有評價？Day 說：「其實嗰日，當時大家一齊排舞，休息時就一齊睇 MV 當放鬆吓，我同佢哋講『我個 MV 有男主角』，佢哋個個都好驚訝，因為佢哋知我勁怕醜，所以見到我喺 MV 入面故作鎮定，佢哋覺得好搞笑。」

〈Wait A Second〉播出以來在網上觀看人數已超逾 60 萬，對此成績，Day 笑言不滿意：「唔滿意！講笑啫，其實都冇話滿唔滿意，好開心大家鍾意首歌，之後我都會繼續出歌，下一首已經有 Demo，至於風格係點，大家期待一下！」