繼邱彥筒 (Marf)、陳泳伽 (Winka)、李芯駖 (Sumling)「單飛」獲得好評後，女子組合 COLLAR 成員 許軼 (Day)，亦於昨日 (4 日) 推出首支個人單曲〈Wait A Second〉。作為 Day 的「單飛」頭炮，曲風以快歌為主，既有擅長的跳舞元素外，亦有 Live Band 元素，更邀請了人氣小鮮肉范麒智 (Kenji) 擔任 MV 男主角，二人在 MV 以學生 Look 上陣零違和感，不過首次「單飛」出歌的 Day 自言心情既緊張又不習慣。

Source: 大國文化

日本排舞一絲不苟

新歌〈Wait A Second〉意旨停一停，是首青春幻想曲，由謝國維編曲監製、陳詠謙填詞，Dear Jane 成員黎俊華 (Nice) 負責打鼓，幕後團隊陣容鼎盛，Day 表示：「今次首歌用咗 2、3 個月時間籌備，比團歌過往用 2、3 星期去完成嘅時間長，事前同咗各方面嘅藝術總監傾咗好耐，花多咗好多時間去構思，特別喺錄音方面，錄咗 3 次，排舞亦特別去咗日本揾當地排舞導師去排。」

姊妹探班窩心打氣

作為第四位「單飛」COLLAR 成員，Day 坦言心情非常緊張：「感覺既擔憂又唔習慣，但有啲興奮，好緊張第一次拍 MV 冇其他成員喺身邊，好驚，但好彩今次搵咗一班跳舞好朋友嚟參與 MV 入面角色，叫有朋友陪就安心啲。」

MV 拍攝期間，COLLAR 成員蘇雅琳 (Ivy)、沈貞巧 (Gao) 同陳泳伽 (Winka) 亦專誠到場探班，為 Day 打氣，表現窩心。Day 表示：「隊友們有俾好多意見我，由未出歌就幫手諗，我有 send 首曲畀 Gao 聽，佢已經幫手作啲搞笑嘅歌詞。」

滿有憧憬上頒獎台

提到終於「單飛」出道，Day 透露背後原來是一眾 COLLAR 隊友出力推動：「其實我一直好嚮往團體，但同隊友傾偈，佢哋都有自己嘅發展，大家畀咗好多鼓勵我，叫我不如都試吓，做啲自己想做嘅歌，於是我就嘗試。」

過往 COLLAR 成員「單飛」都有好成績，問到 Day 會否感到壓力？Day 說：「冇壓力！今年大家都有各自發展同自己嘅作品。對獎項方面當然有少少期待啦，因為親眼目睹 Marf 同芯駖攞獎，當時望到佢哋行上頒獎台攞獎，我都好開心好激動，都有幻想當我上台攞獎，佢哋幫我拍掌嘅情況。」

初拍 Kenji 表現緊張

在〈Wait A Second〉MV 中首度跟 Day 合作的 Kenji，笑言第一次跟 Day 交談感覺十分緊張，他表示：「其實我本身好緊張，不過我個人好衰，見到對方比我仲緊張，我個心就會安定咗；拍第一個鏡頭時，我同佢 (Day) 傾偈，佢有少少僵硬，我問佢係咪 I 人，佢話自己係超級 I，其實佢只係慢熱，之後講多少少嘢，發現佢個人其實都幾 fun。」

DAY 許軼 -〈Wait A Second〉(Official Music Video)：

DAY 許軼 -〈Wait A Second〉幕後花絮：