歸綽嶢 (Nancy Kwai) 上年年中展開四季歌曲企劃，推出代表不同季節的歌曲，分別有春天的〈Out of the blue〉、夏天的〈Let go〉、秋天的〈Cardigan〉，來到最終章代表冬天的〈I tried…〉。

Source: Warner Music HK

為配合新歌及企劃主題，團隊特意前往日本北海道拍攝 MV，這次更是 Nancy 第一次親身感受飄雪！Nancy 說：「公司同我講今次 MV 決定去北海道拍雪景果陣我係超級開心！因為我同落雪好冇緣份，我曾經試過好多次計劃去旅行就係睇落雪，做哂功課天氣預告話嗰段時間嗰度係會落雪，點知我去到就係冇雪落！所以我一聽到嘅時候我係好期待親眼見到落雪嘅畫面！但係一諗起咁浪漫嘅畫面竟然係同同事一齊見到就有啲小傷心，哈哈！當我見到啲雪係天上面飄落嚟，唔知點解有種莫明嘅感動！不過有個小遺憾就係因為我哋拍攝 MV 嘅行程都好趕急，所以我哋冇時間可以好好咁感受落雪，冇得砌雪人又無得玩雪戰。」

惡劣天氣竟造就 Nancy 最愛一幕

MV 講述 Nancy 希望透過和男主角相約旅行挽回戀情，可惜最後男主角未有現身，遺下 Nancy 在雪地等待。問到 Nancy MV 中哪一幕最深刻，她笑說：「有一幕我係同男主角去到一個海邊嘅雪地好溫馨咁散步，點知拍攝當日天氣好差，狂風暴雪咁，吹到個頭亂哂，最後我記憶呢一幕係喺一片混亂下咁完成，但估唔到呢一幕會係成個 MV 入面我覺得最好睇、最有感覺嘅一幕。」

Nancy 更笑說遭同事整蠱：「MV 入面有一幕我要仆親，我同事話呢一幕我地一 take 過啦，咁我就做啦，果一次我覺得我仆得好靚，點知因為我太心急，佢地未 roll 機，結果我要再嚟過，之後又因為各種拍攝原因要重複咁拍呢一幕，天氣又大風又凍，我真係「仆」到呆哂，返到酒店發現我兩個膝頭都仆到紅晒，好彩出到嚟效果都幾好，冇白費我仆咗差唔多 20 幾次嘅心血！」

Nancy Kwai 歸綽嶢 -〈I tried…〉(Official Music Video)：

生日正日與華納家族舉行演唱會感期待

2 月 15 日生日的 Nancy 今年生日撞正要開工，甚少慶祝生日的她卻坦言很期待！她說：「近年我都好少特別慶祝生日，都係同屋企人食餐飯行下街就當慶祝咗，對我嚟講生日最緊要食到好食嘅生日蛋糕，但今年撞正同華納一眾歌手做演唱會好緊張！我又未試過同咁多人一齊過生日，所以我都好期待！」