即將踏入蛇年，古天樂旗下公司 One Cool Jam Cast 和 Jam Cast 一眾藝人：余香凝、廖子妤、陳穎欣、林千渟、麥子樂、 徐頴堃、余潔滢、許月湘、李玗蓁、蔡子軒 連同蔡明思、吳嘉禧、李月兒、林嘉宏、劉志偉、林芝羽、屈詠儀、楊雅淇，提早舉行新春團拜，熱熱鬧鬧迎接新年來臨，祝願大家蛇年事事順利、人人安居樂業！One Cool Jam Cast 和 Jam Cast 蛇年亦將喜事重重，除了有蔡明思 (Jessica) 重返公司及順利誕第二胎外，陳穎欣 (Yanny) 亦將於蛇年跟拍拖近八年的音樂人男友陳考威拉埋天窗，認真可喜可賀。

Source: One Cool
Venue: 九龍香格里拉 (香宮)

左至右：林嘉宏、楊雅淇、屈詠儀、李月兒、林芝羽 、蔡子軒

後排左起：許月湘、徐頴堃、陳穎欣、廖子妤；前排左起：吳嘉禧、麥子樂

早前叱咤頒獎禮上，陳考威在頒獎台宣佈年內與女友 Yanny 拉埋天窗；榮升做準人妻的 Yanny，在蛇年最後一次以「女朋友」身份過新春，對此她笑言：「雖然最後一年逗利是，但都唔會好搏命𢭃，因為我派一定比𢭃到嘅多，新年我會出發到北海道旅行。」提到婚禮籌備進展？Yanny 指希望在 2026 年初舉行，因暫時仍有工作在身：「婚禮希望盡量得閒啲先搞，同埋唔想喺好熱同雨季度搞。本身個婚禮想去日本舉行，但傳聞有啲天災，唔想到時賓客同自己會擔心，所以可能會轉地方，而家仲物色緊邊度有舒服、安全又有啲好回憶嘅地方。」

男友無預警宣佈感壓力

對於男友在叱咤頒獎禮上無預警宣佈婚訊，Yanny 表示：「佢唔係一個甜蜜嘅人，佢好木訥，我知佢如果得獎，佢話會多謝我，我仲諗佢唔會講呢樣嘢（指結婚），佢幾怕醜。叱咤真係好多人睇，嗰晚好多人 message 同打電話畀我，但我係一個比較低調嘅人，嗰刻好大壓力，第二日收拾心情先再覆。」

問到可有為成為人妻而做準備？Yanny 笑指不需要：「其實婚後生活冇乜分別，不嬲都一齊住，我只係多咗個稱呼，但我自己聽到家姐叫姐夫做老公，或姐夫叫家姐做老婆，感覺好奇怪，因為太親暱，我諗我同佢要一段時間先消化呢個稱號。」至於婚後，Yanny 表示會繼續幕前工作，暫時沒有生 B 計劃。

Jessica 誕第二胎後復出

後排左起：劉志偉、余潔滢、林千渟、李玗蓁；前排左起：余香凝、蔡明思

至於剛簽約重返 Jam Cast 大家庭的蔡明思 (Jessica)，日前順利誕第二胎，不過她表示其實今胎比上胎陀得辛苦，她說：「見到自己身體變化，可能好肥，今胎我成日都好肚餓，好驚自己再食落去，一發不可收拾；第一胎，冇經驗，事事覺得新奇，但陀第二胎，要湊住大女，好吃力。」Jessica 指坐月後將全面復出。提到好姊妹 Yanny 將結婚，她開心之餘還自薦做婚禮姊妹，Jessica 又表示不會傳授夫妻之道：「每個人都有佢哋自己相處之道，Yanny 同陳考威有佢哋嘅相處方式，仲相處得好好。」

廖子妤蛇年目標考車學裁縫

此外，余香凝 (Jennifer)、廖子妤 (Fish) 在將過去的龍年十分充實！Jennifer 勇奪「影后」獎項，得到的認同也成為她的動力：「嘗試演出劇集《麻甩媽咪》，會展現大家未見過嘅我俾大家睇，希望大家喜歡；而今年我又試咗去台灣拍戲，各方面都好滿意；嚟緊蛇年，希望自己可以多啲突破，兼顧家庭同工作外，仲搵到自己嘅時間做自己鍾意嘅事嘢，好好對待自己。」Fish 自感過去一年身心出現些狀況，她希望蛇年可以好好調整：「今年我希望可以考車、學裁縫，馬來西亞 16、17 歲有車牌，不過我冇考，我係唯一一個返學要同學車埋嘅人，到而家我都要媽咪車，所以我今年目標係考車牌；想學裁縫，本身對改造衫有興趣，希望透過呢個興趣令心情平靜。」