MC 張天賦於生日正日 (12月1日) 推出新歌〈一百個未老先衰的方法〉，非常喜愛燒烤的 MC 日前更獲過千 fans 包下整個燒烤場慶祝其 28 歲生日，實行與 MC 一齊圍爐取暖！

Source: Warner Music HK

MC 分享其洗澡的先後次序

生日會上 MC 與一眾賦二代大玩小遊戲，亦逐一品嚐賦二代悉心為 MC 燒烤的食物，更於生日會問答環節內自爆小時候其實非常不願意洗澡，甚至曾經引致體臭及分享其洗澡的先後次序！

MC：「我細個嘅時候成日都唔願沖涼，所以小學嘅時候曾經係有過體臭，真係有一排係有臭狐㗎！但去到之後我就學識沖涼啦，我就有一個沖涼嘅次序，之前一開始我係沖身再洗頭嘅，但後尾我發現咁我個身乾淨咗我個頭污糟嘅咪滴返落個身度囉？跟住又出現洗面呢個環節，咁我又覺得洗完頭啲污糟野會去返塊面度，咁所以我都係會洗頭先哈哈！」

生日正日推出新歌

生日會尾聲賦二代們送上三層蛋糕，蛋糕主體設計參照其演唱會上型爆彈電結他唱英文歌的造型，同時亦為 MC 2025 年的巡迴演唱會送上祝福，當然也有他的愛犬「豬柳蛋」及一系列 MC 2024 年的精彩時刻，包括參與電影拍攝、考獲電單車車牌，蛋糕上當然也有 MC 不可或缺的手機遊戲畫面及模型擺設。

最後賦二代全晚共唱了八次的生日歌引致 MC 尷尬崩潰大叫！MC 分享新歌由黃偉文 (Wyman) 填詞、湯令山 (Gareth.T) 作曲、徐浩負責監製部份，歌曲是想表達一個人對上一段感情所受到的痛苦，而生日正日推出新歌則是公司的想法。

MC 新歌〈一百個未老先衰的方法〉表達一個人對上一段感情所受到的痛苦。

MV 〈一百個未老先衰的方法〉造型照。

MC 張天賦 -〈一百個未老先衰的方法〉(Official Music Video)：

問 MC 對於華納高層 (WarnerGoChan) 較早前發佈的新歌預告中，同事突然唱生日歌，當時的你有什麼感受？
他回答：「因為原本我嘅心路歷程，我係非常之認真去演吹蠟燭嗰一幕戲，然後我以為高層們唱生日歌嘅時候係會有蛋糕或者咩驚喜啦，點知係冇㗎喎！但係導演未嗌 cut 我又唔能夠移開個目光，所以我決定瞄一瞄有冇蛋糕啦，原來係冇㗎！我就喺度諗點解導演仲未嗌 cut 嘅？我明明好認真㗎嘛！」

過千 fans 包場賀壽

MC 亦表示：「第一次搞咁大型生日會其實係幾開心嘅！因為可以一次過見到咁多賦二代，同時亦都有咁多禮物收，但真係實在太多零食喇，可以減少，因為我嚟緊會好大隻！咁所以就唔食零食喇，希望下次可以繼續搞生日會，最好有埋場地、食物 sponsor 哈哈！」

對於生日願望，MC 亦坦白說他不是一個非常注重節日的人，因為「開心可以日日也開心，慶祝也可以日日慶祝」，所以生日願望也是希望自己能做到自己定下過的目標、答應過的事，至於正日生日相信也會簡簡單單地過，他認為簡簡單單是一件最幸福的事。