繼〈望年月〉和〈被吃掉的靈魂〉後，許靖韻 (Angela) 推出今年第三首廣東歌作品〈作賤〉，歌曲由 KW 朱敏希作曲、張楚翹填詞、廖志華監製、黃兆銘編曲。Angela 表示歌曲靈感是從她一聽到這首歌的 demo 開始，「一聽到demo我個腦入面淨係出現咗一個『賤』字！哈哈，好賤！係一個好犯賤嘅感覺，喺感情裏面係飾演緊一個好卑微、犯賤嘅一方。」之後她便找來跟她合作無間的填詞人張楚翹主理新歌歌詞。

Source: 英皇娛樂

Angela 透露為了更加投入，錄音時一直聽着容祖兒的〈出賣〉幫助「入戲」，「我好鍾意呢首歌，而家個 feel 亦好中，雖然歌詞唔同，但成個意境就係呢個感覺，真心慘絕人寰㗎！」

問到在愛情中有否作賤自己的經歷，Angela 笑言「經驗豐富」：「中學嘅時候冇乜錢，雖然我冇試過做幾份兼職買禮物俾對方，但我試過連續好多日捱肚餓、同人 share lunch，儲錢買波鞋俾當時嘅初戀。另外一件作賤自己嘅經歷都係中學發生，我諗係比較細個先會失去理智咁樣瘋狂打好多次電話，就好似 MV 入面咁樣，瘋狂打好多次電話俾對方，呢一種都係比較卑微嘅感情狀態。」

她繼續滔滔不絕分享：「同對方鬧交，每一次都係我認錯先，每一次分手都係我去哄返對方先，試過直程去對方屋企搵對方復合，而家諗返起嗰陣時都係作賤自己嘅經歷，哈哈！」

許靖韻 Angela Hui -〈作賤〉(Official MV)：

來到年尾，總結今年，Angela 坦言過得十分充實，推出了三首歌曲、又舉行了巡迴音樂會、亦作出新嘗試跟品牌合作推出自家設計的服飾，「回望 2024 ，真係覺得太快，我而家仲覺得好似過緊暑假。今年好開心有三首歌，亦都係自己鍾意嘅作品，雖然主題都係比較 sad，但都係自己比較擅長嘅曲風。」

Angela 又謂透過巡演，更能直接知道觀眾的喜好，並且有新發現，「抒情歌同埋 Ballad 都會係我最擅長同埋大家喜愛嘅曲風，但喺今年巡演上唱〈琢磨〉嘅時候，觀眾係好有反應，亦都好有氣氛，所以嚟緊有機會想再做一首偏搖滾小小嘅一首歌。」