MC 張天賦近期狀態大勇，最近忙於宣傳與吳君如合作的電影時亦不忘推出新歌〈小心碰頭〉，是繼〈百萬大道〉後另一首獨力完成作曲的作品，作詞再次邀請到黃偉文，而編曲及監製則邀請到徐浩、黃兆銘及 GooChan。MC 說：「〈小心碰頭〉當初寫嘅原因係我覺得我嘅歌庫入面欠缺咗一首三拍嘅歌，或者六拍八（拍子）嘅歌，於是就想自己寫一首，我寫嘅 demo 詞有提及『好好記住我』、『聖誕快樂』，所以我覺得 （呢首歌）係喺重要日子同某一半講嘅嘢，但未必要對方聽到嘅，最後就變咗〈小心碰頭〉呢首歌。」

Source: Warner Music HK

邀來台灣女演員林廷憶擔任 MV 女主角

今次 MV 的導演 Remii 黃婕妤去年已經和 MC 合作過〈抽〉及〈與我無關〉兩個 MV，早前 Netflix 的熱門影集《愛愛內含光》亦是由她所執導，而這次的女主角 Suri 林廷憶曾獲選台北電影節非常新人，亦正參演 Netflix 影集。MV 推出後她亦於網上發文表示：「謝謝 MC 打起枕頭戰沒有一點點的手下留情。」可見 MC 一貫貪玩作風從未改變，即使面對女生亦毫不留手，十分百厭！

MC 與女主角「舌戰」

而 MV 花絮入面見到 MC 同女主角拍鬧交戲時原來係雞同鴨講，MC 一直以廣東話與 Suri 爭論，而女主角一直七情上面用國語答「講中文」，然而 MC 最後唔爭氣笑場舌戰敗陣！MC 續說：「今次 MV 嘅趣事都幾多，有一幕我要同女主角嘈交，但我覺得用國語去嘈交未必可以令情緒爆發到，所以我係用廣東話而佢係講國語！同埋今次有個拍攝手法係喺其他 MV 無出現過嘅，就係我地會喺拍攝途中突然⋯⋯ 定格！哈哈。」

今次 MV 造型有別於〈百萬大道〉的冷酷型格，戴上眼鏡的 MC 亦很有鄰家男孩的感覺，非常 boyfriend-able！MC 說眼鏡造型並不是自己的 idea, 是公司的建議，但亦相信有部分 fans 會喜歡眼鏡造型。被問到今次 MV 為何選址台北？他回應：「都係公司嘅決定嚟嘅，但我覺得今次係一個非常休閒同開心嘅旅程，所以嚟緊都可以有多啲呢啲決定，哈哈！」

MC 自爆減肥進度

之前華納高層發布一段片段，MC 曾揚言要減肥，在台灣拍 MV 期間有沒有破戒？他笑說：「係無破戒嘅，因為食嘢都唔係咩戒嚟嘅，er…err…（口窒）算啦⋯⋯ 即係大家⋯⋯ 瘦嘅我見到就見啦哈哈！（咁減肥呢方面有無咩進展？）減肥呢方面嘅進展就係大家見我包到咁實就知⋯⋯ 個進展非常之緩慢啦，但係就⋯⋯ 好快㗎喇，喺嚟緊嘅演唱會，不久嘅將來⋯⋯ 三五年後就可能會見到個進程⋯⋯」

〈小心碰頭〉這首歌曲是 MC 第二首獨自作曲嘅歌曲，問到今年內會再推出多少自己創作的歌曲？會否推出一張全部自己創作的專輯？MC 說：「呢個當然係我嘅願景啦，但係都要睇吓公司肯唔肯用我嘅歌啦，但其實目前我都寫咗頗多自己嘅歌，我覺得好睇呢首歌嘅反應，所以大家記得聽〈小心碰頭〉！」

MC 張天賦 – 〈小心碰頭 Mind Your Ex〉 (Official Music Video)

〈小心碰頭〉MV 幕後花絮：