林奕匡、黃妍、葉巧琳初次合作，即登日本著名音樂頻道！

2024 年 3 月 22 日

演繹過〈高山低谷〉10 周年版本後，林奕匡 (Phil) 這次帶同兩位師妹黃妍 (Cath) 及葉巧琳 (Mischa) 一同現身日本著名音樂頻道 THE FIRST TAKE (TFT)，三人這次更帶同最新作品〈藝術與科學〉登場。Phil、Cath 及 Mischa 日前特別現身觀塘 apm 商場，與 Fans 們一同同步觀賞首播外，亦分享了他們參與這次錄音的小故事。

Edtior: Meiling Heung
Source: Sony Music HK

少見兩女一男合唱作品 —〈藝術與科學〉

林奕匡是三人之中獲得兩次表演機會的一個，所以他其中一首唱了〈高山低谷〉，第二首就想玩味一點，他在台上說道：「第二首想好玩啲，就 featuring Cath 同 Mischa。當時冇歌啱用，因為市面上真係好少兩女一男合唱歌，自己亦唔慣寫呢類歌，後來將一首 Solo 歌轉 Key，就啱大家合唱了，然後再交俾 Wyman (黃偉文) 填詞。第一次正式收錄就係 TFT，其實好冒險，因為如果唱錯歌詞，就永世都係唱錯嘅版本了。」

Phil Lam 林奕匡 × Cath Wong 黃妍 × Mischa Ip 葉巧琳 – Art and Science 〈藝術與科學〉 / THE FIRST TAKE

黃妍亦表示這次 TFT 錄音非常難，她說：「我係幾個禮拜密集式乜歌都唔練，淨係練〈藝術與科學〉。」葉巧琳亦透露：「我哋不停去監製 Edward Chan 嘅 Studio，模擬錄音過程，我同 Cath 首先要習慣對望，唔准笑，就連戴 Headphone 都要有技巧潛水式拉開戴上，以免影響妝容。」

到正式在日本錄音室，三個人都緊張到不得了！他們也透露了錄音時的狀況，Phil 道：「入去做測試時好多工作人員喺度，但測試完離開，再一次入錄音室，啲人全部走晒，淨係得返錄影機、咪同我哋自己。然後講我哋嘅 Keyword『We are ready』，就正式開始。」Mischa 在錄音前哼兩聲簡單開聲表現較輕鬆，但 Cath 則呆站著，她自己解釋道：「我係緊張到一片空白，好在練到入晒骨，就算冇望到大字報都可以 Load 返歌詞出嚟。其實 Mischa 事前有叫我望吓佢個樣，如果有咩問題，提返佢，但我真係冇望過。」

三人互爆錄音「小習慣」，引起全場哄笑

三個好友這次共同經歷一次難忘的音樂旅程，相處多了，大家對各自認識又多了，Mischa 更表示：「特別係 Cath 更加深厚，佢有個小習慣經常做，其他同事都會知，但我唔會話俾你哋聽。」這時全場起哄，沒想到 Cath 自爆道：「我成日都會放屁，但我係有公德心嘅人，會話俾大家聽我放咗屁。」Mischa 聽罷即抗議：「其實你放屁唔洗喺我哋企嘅範圍，可以行去冇人嘅地方。」Phil 亦附和道：「你仲要放完行埋嚟！」搞笑的 Cath 更笑著說：「係呀，我仲會同佢哋講：『你聞吓』，其實身體好先會放屁。」Cath 接著又大爆 Mischa 的錄音小習慣，道：「佢錄音前會痾屎呀！」更說大家會在廁所遇到，Mischa 聽到 Cath 所說，也無奈表示：「我接唔到喇，你繼續啦。」三個人你一言我一語，爆笑全場。

黃妍與葉巧琳互爆錄音小習慣。

與樂迷聚首觀塘 apm 商場，觀賞新歌〈藝術與科學〉THE FIRST TAKE 首播

爆料一輪之後，終於來到首播的一刻，Phil、Cath、Mischa 與 Fans 望著現場的大電視，都流露出滿足的神情 — Phil 笑得雙眼都變成一條直線，Cath 的招牌開懷傻笑，還有 Mischa 帶著感動的微笑，都可見他們對於這次合作甚感滿意。

睇完 MV 後，Phil 即表示：「Mischa 向來比較 Cool，我好少見佢笑，透過〈藝術與科學〉先可以見咁多。」Cath 也透露 MV 裡的眼神對接，其實在事前都有練習過，她說：「一開頭係有 Design 咗，邊啲位要望一望，但後來投入去唱都冇太理，反正都熟練去表露出嚟。」現在成品終於面世，Phil 笑言：「而家真係出咗街，第一次真係鬆一口氣，都 OK 喎！」至於精益求精的 Mischa 則表示：「我嘅表情管理要再做好啲。」

林奕匡、黃妍、葉巧琳日前一同於觀塘 apm 出席活動。

三人這次日本之旅，亦有前往富士山一帶拍攝宣傳用物料，他們在活動上亦有分享當中趣聞，隨後，Mischa 唱出同樣由 Phil 創作的〈難道我還未夠難〉，而 Cath 則演繹了今年入圍香港電影金像獎最佳電影歌曲〈日光漂白〉，至於 Phil，他除了首度公開演繹 10 周年版本〈高山低谷〉外，在活動尾聲，他更宣布將於4月底舉行 3 年來首個Mini Live，更多詳情將於社交平台公布。

林奕匡、黃妍、葉巧琳與歌迷們一同觀看〈藝術與科學〉TFT 首播。

陳柏宇攜女兒於個人頻道點評 Sony 三寶於 TFT 演出

陳柏宇 (Jason) 於個人頻道的「陳伯吹水台」首播 Phil、Cath 和 Mischa 於 TFT 的演出，亦是他第一次收聽〈藝術與科學〉。總括而言，Jason 認為三人演出非常不錯，亦大讚此作品的編曲很有誠意，因為聽得出是專為「三人合唱」而寫的作品，如真要問有甚麼地方需要改善，Jason 謂作為一位歌手身份去分析的話，或許三人再唱多點「和音」層次會更豐富，而坐在他大腿上的囡囡反應亦超萌，Jason 與她的互動很真實、可愛！