「網絡一堆審判官 都等吃花生」，簡短明瞭的字句，卻完整敍述現時網絡現象，亦正是陳蕾《以正義之名》這首令人自省的作品帶出的重心訊息！

陳蕾近日發佈最新搖滾單曲《以正義之名》，早前釋出的新歌預告已令歌迷引頸以待，陳蕾說新歌靈感是來自網上經常出現的一些以正義之名所留下具攻擊性、很惡毒的留言，她認為這些留言對善良或正義的理解好像有著雙重標準，令陳蕾反思這個網上風氣有感而發創作的。

Editor: Meiling Heung
圖片來源：Warner Music Hong Kong

MV 入面陳蕾演技大爆發，用瘋狂表情演繹出歌詞的憤怒與態度，華納高層將她的表情包配入《喜劇之王》張柏芝試戲名場面亦完全無違和感！近月有做 Gym 操練為演唱會做準備的 Panther 亦展現出肌肉與力量，單手拿起結他怒劈電腦表現霸氣！又有玩火與玩劍的場面，陳蕾說：「今次 MV 入面都有啲玩火又打爛部電腦嘅場面，望落好似好危險但其實好安全，反而係有一幕我單手舉起結他兜頭打落個電腦度，嚇親在場嘅同事，佢地好驚訝點解我咁勁可以單手舉起個結他！」

拍攝時陳蕾看重播不時特別留意自己的肌肉線條有否展現出來，問到華納是否個個都行騷肌肉路線？陳蕾則說：「我自己覺得如果身型好睇啲，咁梗係著衫都可以著多啲（選擇）啦！同埋對我嚟講，我嘅身型都係我展現型格嘅一部份，所以我都好想維持到有肌肉嘅一種骨感感覺！但我其實都食好多嘢㗎！」

新歌 MV 由同門師妹兼份屬好友的張蔓姿執導

陳蕾說：「新歌 MV 由我老友 Gigi 張蔓姿執導，因為我睇過佢今年幫 MC 拍《花海》同埋 Zpecial《島嶼時間囊》嘅 MV，覺得好有型！咁呢首咁有態度嘅歌令我諗起不如都試吓搵 Gigi 拍啦！由一開始 Gigi 同我講佢嘅諗法嘅時候，我已經覺得我完全無搵錯人，到我有得睇個成品嘅時候，我覺得可能係我拍過最有型嘅 MV 呀！無論係成個 MV 嘅剪接、妝頭、服裝等等，我全部都好鍾意，好符合到我隻歌嘅氛圍，直情係我個腦諗到想要嘅嘢！我覺得 Gigi 好無私咁佢將所有最有型嘅 Idea 比哂我，我同佢可以話係情同姊妹呀！真係唔係我誇張，出到嚟個效果我真係十分滿意，佢真係一個好有才華嘅女仔！」

Gigi 則說：「當初知道陳蕾想搵我拍 MV 嘅時候我超級開心，因為我哋一直都好 Friend，我由好耐之前幫佢演出《娑婆》MV 而開始認識，後來我加入咗華納同佢同一間公司，到今次幫佢執導 MV，我覺得成件事好有緣份！但係開心之餘，同時我都好驚，我可唔可以拍到個 MV 好似佢首歌咁有型呢？所以今次都真係花咗好多心機喺造型、場面設計同道具上，同埋加咗好多愛入去，好在最後公司同陳蕾都好滿意個成果！而 Panther 都好有表演天份，一啲瘋癲表情同情緒化啲嘅反應佢都完全做到，所以佢真係表現得非常出色！」

問到早前宣佈將於 2024年 3月3-5日 舉行紅館演唱會的陳蕾，是否已經閉關密密練歌及操體能？陳蕾笑說：「其實都開始不停開會討論架啦，不過應該都仲有啲時間可以打多一陣機，哈哈！同埋最緊要係完成埋手頭上嘅工作再努力寫多啲歌，我已經同公司 Mark 咗下年成個二月都係綵排同綵排，希望喺台上俾最好嘅演出大家！」

陳蕾《以正義之名》MV：

陳蕾《以正義之名》花絮片段：