唱作女歌手陳蕾 (Panther) 今日推出全新歌曲〈空無之地〉，這首歌曲繼續由她本人完成曲詞，Bert、To Lee、Eric Chan、Danny Yau 完成編曲，並由 Bert 負責監製部份。「空無之地」一詞來自一本名為《每一天，都是放手的練習》的書，意思是當人離開舒適圈，失去了本來屬於自己的東西後，所進入的一個「一無所有」而使人不安的境地。但是，陳蕾認為「空無之地」並不絕望，人反而要「無」，才會使自己日後擁有更多；人要「放下」手上的東西，才可以用這雙手創造更多可能性。

Source: Warner Music HK

陳蕾分享其實 2020 年已經開始寫這首歌，當時寫了頭半段的歌詞，但一直構思不到如何寫下去，直至時間來到 2025 還是很喜歡這首歌，很想繼續推出的時候，她就嘗試去找尋「空無之地」，何謂「空無」？「嘩！原來『空無』聽落好似好悲傷、負面，但其實換個角度睇，可以係一個好好嘅機會比你做任何嘗試、做任何開創，我就俾呢個感覺深深感動到，寫到後半段嘅歌詞，所以呢首歌對我嚟講，一路寫已經有無限感動湧現出嚟，可能係我寫過最感動到自己嘅一首歌！」

陳蕾曾於過往的訪問預告接下來的新歌〈空無之地〉是她私心非常喜歡的一首歌曲，她坦言於創作這首歌的時候，對於人生體悟多了一重意義，她表示如果這一刻你覺得自己處於一個很空無、離開了舒適圈而又見不到曙光的階段，不要害怕自己兩手空空或覺得失去很多事物，因為正正在這個階段，你可以甚麼都嘗試！因為已經兩手空空，所以更不用害怕失去！即管去開創更多新的窗口，即管去推開它，就如歌詞中一句：「能夠放下便徒手  接萬有」！完成這首歌之後，她覺得這首歌是繼〈相信一切是最好的安排〉之後，另一首很重要地支撐她渡過每一個階段的歌！

挑戰四日拍三個 MV 及專輯封面

團隊為配合歌曲意境，特意到東京富士山拍攝 MV，全身黑色簡潔造型的陳蕾漫無目的地遊走於看似無盡頭的荒廢隧道、極簡水泥牆壁空間，更躺於富士山黑色泥土上，畫面盡現萬物虛無的感覺，畫面背後陳蕾可謂經歷盡艱辛，險於富士山因失溫暈倒！

陳蕾說：「因為今次去日本其實係要連拍三首歌嘅 ＭＶ，同埋預計年尾就會推出個人大碟入面嘅相，所以其實每一日都好唔夠瞓，再加上每日都要好早就化妝，同埋要跑唔同地點嘅拍攝，拍呢首歌嘅 ＭＶ 嗰日室外天氣好熱，喺陽光底下我著嗰套衫都會流汗，但係一去到隧道嗰個地方係凍到需要有件羽絨笠住，我之前喺香港仲係度諗，嘩！夏天有時拍室內都覺得熱，唔洗帶保暖嘅衫去啦，點知去到就好後悔喇！一冷一熱加上又唔夠瞓，拍咗第一個鏡頭已經低血糖，我啲同事驚我真係暈喺富士山，一 cut 機就瘋狂咁比我食嘢，狂食朱古力，最後我係直情瞓咗喺富士山嘅泥地上面差唔多 20 分鐘，啲血糖先慢慢開始升返上嚟，可以正常拍攝，好彩拍 MV 嗰件衫係睇唔到我個肚，如果唔係就真係浪費晒同事們嘅心機，哈哈！」

預告年尾出碟

至於預計於年尾推出的個人大碟，陳蕾亦有劇透：「年尾嘅嗰張個人大碟其實係想講『我』，可能大家會成日見到開心嘅我、樂觀嘅我，但其實呢個『我』除咗由開心同樂觀嘅『我』組成之外，仲有好多唔同面向嘅『我』組成，希望大家可以透過呢隻碟了解到更多、更立體嘅我。」

〈空無之地〉MV 將於今晚 9PM 於陳蕾 YouTube Channel 上架，敬請密切期待！