何榛綦 (Natalie) 繼去年推出〈第一零一次再見〉後，昨日推出年度首支派台歌〈第一萬零一次重遇〉，跟上一首歌作呼應，以友情為主題，帶出「再見」過後便會「重遇」，宣揚珍惜每段好友關係；Natalie 透露，早前曾患上嚴重皮膚炎，整個人變得浮腫，就連工作亦要暫緩，終日以淚洗面，全賴身邊好友鼓勵及陪伴，令她度過這個人生低潮期。

歌曲〈第一萬零一次重遇〉，由 Cousin Fung 作曲、編寫及監製，林若寧填詞，曲風以輕快為主，呈現好友「重遇」開心情懷，Natalie 說：「今次歌曲跟〈第一零一次再見〉有相連關係，都係人生一定會經歷嘅情景，不論係離別定重逢，都係成長必經階段，亦希望透過歌曲，帶出好好珍惜身邊每段友情嘅訊息。」

Natalie Ho 何榛綦 -〈第一萬零一次重遇〉(Official Music Video)：

拍 MV 初嘗坐電單車

今次歌曲 MV，跟〈第一零一次再見〉一樣，在台灣取景拍攝，靚人靚景，期間拍攝組除安排幾位台灣女生飾演 Natalie 好友外，亦有 Natalie 大玩煙花及初嚐坐電單車的滋味，Natalie 表示：「嗰次係我第一次坐電單車，感覺好好奇，但原來要平衡係好難，同普通單車差好遠，短短 10 分鐘拍攝，我緊張到流晒汗，但都好開心，希望下次有機會再玩過。」

提到今次歌曲主題-友情，Natalie 透露早前曾經歷人生低潮期，全賴身邊好友鼓勵，才令她振作起來：「之前突然免疫力下降，然後皮膚炎，成個人腫晒，咁啱嗰時又要拍 MV，但因為病，工作要延遲，覺得好沮喪，有種好對唔住身邊製作團隊嘅感覺，每日都喊同好自責，好彩嗰時身邊好朋友好鼓勵我，話我已經病，要保持心境開朗先會好返，好感謝佢哋當時對我嘅開解，令我慢慢好過來。」

榛綦再次到台灣取景拍攝新歌 MV。