早前泳兒 (Vincy) 找來江若琳 (Elanne) 拍攝情人節短片，為 Elanne 製造情人節驚喜給老公蕭唯展 (Oscar)。炮製驚喜前，Vincy 跟 Elanne 更特別約出來開會，先了解 Oscar 的習性。

Source: 英皇娛樂

多數女生或多或少都需有一點儀式感，當 Vincy 問 Elanne 時，她坦言自己是「零儀式感」，更指老公 Oscar 同樣沒有，Vincy 十分驚訝：「妳唔會嬲㗎？」Elanne 坦言：「少嬲囉！口講話『唔嬲、唔駛啦。』心裏面就反晒眼。拍拖頭一年就有嘅，哈哈！之後就冇喇。」

Vincy 追問她喜歡 Oscar 甚麼，Elanne 指喜歡他夠現實：「好踏實嘅，佢嗰啲浪漫同埋情趣係得我一個人會明白，所以佢應該係溝唔到其他女人嘅，哈哈！情人節我哋冇 plan 㗎。」然後 Vincy 開始試探 Oscar 是否會猜到驚喜，Elanne 笑說：「佢係唔醒目，因為佢知道我從來唔會做任何嘢，佢應該諗唔到，以佢嘅智商。」

一切準備就緒，原來驚喜是 camping，又與 Vincy 一齊煲了 Oscar 喜歡吃的臘味糯米飯、蛇羹，又於營地上掛起多張 Elanne 跟 Oscar 的合照、一家三口的合照，再加上燈飾，既溫馨又浪漫。

當 Oscar 到達營地見到 Vincy 時，平淡地說：「喂，好耐冇見喎！」原來較早前 Elanne 已露出馬腳，Oscar 問她當日有甚麼工作時，Elanne 一時說拍賀年訪問、一時又說要回公司開會。當 Vincy 回到露營車上跟 Elanne 準備糯米飯時，獨留在外的 Oscar說：「呢啲環境我懷疑個仔已經出現埋喇喎！好嘢呀，今日啱啱係最凍，出咗呢個寒冷天氣警報，俾咗呢個驚喜係非常之難忘嘅。」

隨後，Vincy 跟 Elanne 送上糯米飯及蛇羹，又播出他們一家三口的短片，三人看到眼濕濕，Vincy 見 Elanne 哭出來，自己也忍不住流下眼淚，最後更帶來一歲的兒子 Owen，整個驚喜圓滿結束。

問到 Vincy 籌備這個企劃原因，她指雖然自己並非典型的 sweet 女生，但卻是喜歡給朋友或另一半驚喜的人：「我係一個行動型嘅女朋友，所以今次都想將我呢個好鍾意俾 surprise 人嘅一個喜好，送俾一啲圈中嘅情侶好朋友。」

播片時，不料 Vincy 的新歌〈無糖可樂〉含洋蔥量極高，Vincy 和 Elaine 聽畢都喊埋一份，Vincy 又謂自己是一個很容易被其他人情緒感染的人：「條片嘅 background music 係我首新歌〈無糖可樂〉，聽返原來係有咁大威力，夾落去一啲溫馨畫面度，威力好大，我覺得成件事係觸動到我。」

問到今年情人節如何度過？她說：「就係喺公司間 Concept Store 唱歌，然後返屋企二人世界。我覺得最浪漫嘅情人節就係兩個人一齊過，做乜都冇所謂，唔一定要一啲好天花龍鳳嘅驚喜，食餐飯一齊度過咗嗰日已經係好浪漫。」

完整內容：